Koalicioni Euroatlantik ka bërë një reagim lidhur me lajmet që po qarkullojnë, se zyrave të kësaj force politike në Tiranë iu është vënë çelësi.
Për VNA.al, duke qenë se kjo media ishte e para e cila raportoi boshatisjen e zyrave të euroatlantikëve në rrugën “Donika Kastrioti”, partia e Lulzim Bashës ka pohuar se ndryshimi i ambienteve ka ardhur për arsye organizative dhe se nuk është tërhequr nga angazhimi politik.
“Për arsye organizative dhe për të garantuar mirëadministrimin e punës, po ndryshojmë ambientet ku do të zhvillohet aktiviteti ynë, por kjo nuk do të thotë heqje dorë nga kauza dhe angazhimi ynë politik si Partia Demokratike – Demokratët Euroatlantikë”, thuhet në reagim, duke theksuar më tej se kjo forcë politike nuk është një parti e re, por vetëm instrument ligjor për pjesëmarrje në zgjedhje.
Gjithashtu, në këtë reagim është theksuar edhe njëherë qëndrimi i kreut të kësaj force politike, Lulzim Bashës duke thënë se ky i fundit nuk do të heqë dorë nga vula e Partisë Demokratike dhe nëse do të duhet të shkojë në Gjykatën e Strasburgut.
Reagimi i plotë për VNA:
Përshëndetje,
Në lidhje me shkrimin e publikuar sot nga redaksia juaj, me titull “Nuk mori as mandatin e tij të deputetit, Lulzim Basha mbyll zyrat e Koalicionit Euroatlantik”, dëshirojmë të sqarojmë opinionin publik dhe të përgënjeshtrojmë informacionet e pasakta që përmban ky artikull.
Së pari, nuk është krijuar asnjë parti e re nga ana jonë. Koalicioni Euroatlantik ka qenë një instrument ligjor për pjesëmarrje në zgjedhje, ashtu siç është bërë e qartë pas 11 qershorit 2024, kur pazari mes Ramës dhe Berishës prodhoi vendimin skandaloz të Apelit.
Në asnjë moment z. Basha nuk ka hequr dhe nuk do të heqë dorë nga përballja për legjitimitetin e Partisë Demokratike, qoftë në Gjykatën e Lartë, qoftë në Gjykatën e Strasburgut, nëse kjo do të jetë e nevojshme. Sepse padrejtësia nuk duhet të triumfojë në Shqipëri.
Për arsye organizative dhe për të garantuar mirëadministrimin e punës, po ndryshojmë ambientet ku do të zhvillohet aktiviteti ynë, por kjo nuk do të thotë heqje dorë nga kauza dhe angazhimi ynë politik si Partia Demokratike – Demokratët Euroatlantikë.
