Presidenti Ilir Meta ditën e djeshme, në Ditën Ndërkombëtare të Lirisë së Medias u prit në një takim nga Presidenti i Turqisë Rexhep Tayyip Erdogan.
Një gjë e tillë, ka bërë që ish-ministri i zgjedhur nga Meta, Ylli Manjani, të komentojë në rrjetet sociale duke ironizuar faktin që kreu i shtetit, pikërisht në një ditë kaq të rëndësishme u shfaq krah Presidentit të Turqisë, i njohur si dhunues i fjalës së lirë.
“Një këshillë e vonuar. Pa dyshim që vizita e Presidentit të Republikës në Turqi dhe takimi me Presidentin e Turqisë, bash në ditën e lirisë së medias, nuk shkon.
Dje në mëngjes Presidenti i Republikës foli për lirinë e medias, ndërsa pasdite ishte në krah të Presidentit Turk që zyrtarisht është i njohur si dhunuesi i fjalës së lirë.
Prej vitesh, përgjatë sundimit të tij në Turqi, Turqia është shteti më i akuzuar, gjykuar e ndëshkuar nga Gjykata e Strasburg për dhunim të lirisë së shprehjes. (Artikulli 10 i Konventës).
Ndaj Presidenti ynë dje duhej të zgjidhte njërin prej eventeve; ose lirinë e shprehjes ose dhunimin e saj.
Me të dyja nuk shkon.
Mund ta shtynte në kohë takimin me Presidentin Turk, por jo dje.
Dje për respekt të ditës së lirisë së shprehjes, duhej të rrinte larg edhe Kryeministrit të vendit të tij (që dekretoi vetë), jo të shfaqej në krah të “babait” të dhunimit të lirisë së fjalës”, shkruan Manjani.
