Dhe sot dua të them se të thërrasin emrin në kor “Tifozat Kuq e Zi” është nderi më i madh që mund të të bëhet
Marin Mema
Rreth 5 vite më parë pata fatin të merrja një çmim që deri në fund te jetës do të më bëjë krenar. Ishte viti 2013 kur grupimi “Tifozat Kuq e Zi” më akordoi cmimin “O sa mirë me qenë Shqiptar”. Ata janë një grup djemsh e vajzash me ideale, patriotë në një kohë kur patriotizmi cilësohet shpesh me keqdashje si ekstremizëm, të gatshëm për t’i dhënë shpirtin dhe lartësuar emrin shqiptar kudo nëpër botë.
E pra, e gjithë shqiptaria sëbashku me vlerat dhe krenarinë e saj është e mishëruar në një emër, “Tifozat Kuq e Zi”. E vlerësova atë çmim sepse shumëçka më afron edhe mua si njeri i thjeshtë por edhe në profesionin tim, me misionin e këtyre njerëzve, krenaria e të qenurit shqiptar bashkuar nën ngjyrat kuq e zi.
Sot TKZ mbush 15 vjet nga krijimi i saj. E krijuar në një muaj të ftohtë si dhjetori, për të ngrohur zemrat në çdo stinë. Të shpallur shpesh si lojtari i 12 në fushë, pas koreve dhe shpirtit të tyre fshihet suksesi në shumë sfida, ku ka spikatur një kulturë sportive, shembull që mund të merret nga shumë tifozeri në mbarë botën.
Tribunat ju njohën fillimisht në një ndeshje miqësore ndaj Suedisë. Atëherë ishit shumë pak, por përkushtimi bëri që kohë pas kohe të bashkoheni në mijëra, të ngrini zërin për kombëtaren, shqiptarët dhe Shqipërinë. T’ju them na keni bërë të ndihemi krenar është pak! Pas kaq vitesh, nën moton “O sa mirë me qenë Shqiptar” nuk keni bërë thjesht detyrën si grupim, por i keni dhënë zë dhe frymë një kauze të madhe, shqiptarisë!
Në festën e 15 vjetorit tuaj mbajta një fjalim të shkurtër, me fjalë zemre e të sinqerta si pjesë e juaja . Dhe sot dua të them se të thërrasin emrin në kor “Tifozat Kuq e Zi” është nderi më i madh që mund të të bëhet. Faleminderit.
TKZ, lum ne që ju kemi!
