Socialistët vijojnë të kenë bindjen se ngjarja e “21 Janarit” duhet të zbardhet sa më parë. Dje u bënë 9 vite nga “21 Janari” i përgjakshëm, ku gjatë protestës së opozitës së majtë u vranë katër protestuesit Aleks Nika, Ziver Veizi, Hekuran Deda dhe Faik Myrtaj në bulevardin “Dëshmorët e Kombit”.
Ashtu si në çdo vit, ceremonia u zhvillua para Kryeministrisë, por familjarët e viktimave i priti kreu i grupit parlamentar të PS, Taulant Balla, ndërsa të pranishëm ishin ministra dhe deputetë që bënë homazhe në bulevardin “Dëshmorët e Kombit”. Megjithatë, pas mbarimit të këtij rituali, vërshuan dhe komente dhe reagimet për këtë tragjedi. Gjatë një prononcimi për gazetën “SOT”, deputeti i Partisë Socialiste, Andrea Marto u shpreh se 21 Janari i vitit 2011 është një nga ditët më të zeza që kanë ndodhur në këto tre dekada demokraci, ndërsa theksoi se ka ardhur koha që përgjegjësit që urdhëruan vrasjen e katër protestuesve të pafajshëm të dalin para drejtësisë.
“21 janari 2019 shënon ngjarjen më dramatike të 30 viteve të fundit në Shqipëri. Shteti me gjakftohtësi ekzekutoi katër protestues paqësorë dhe djallëzisht u përpoq të fajësojë opozitën. Edhe kur për të gjithë opinionin publik u bë e qartë se kush ishin vrasësit, qeveria u përpoq me të gjitha mënyrat të mos lejojë zbardhjen e ngjarjes dhe dënimin e autorëve si edhe të urdhëruesit/esve. Për rrjedhojë gjyqi për autorët e kësaj vrasjeje shtetërore ishte thjesht një farsë. Gjykoj se ngjarja e 21 Janarit duhet të rigjykohet dhe duhet të përbëjë një nga përparësitë e SPAK-ut”, deklaroi socialisti Marto.
Ndërkohë, deputeti tjetër i Partisë Socialiste, Bujar Çela gjatë një prononcimi për gazetën “SOT” u shpreh dje se ata si mazhorancë nuk e kanë mbajtur premtimin për të zbardhur masakrën e “21 Janarit”, ndërsa i bëri thirrje SPAK që të hetojë këtë ngjarje, në mënyrë që sipas tij, përgjegjësit të marrin dënimin e merituar. “Ne si opozitë e atëhershme bëmë gjithçka për votën e lirë, deri në larjen e sheshit të protestave me gjak. Por si qeverisje sa i takon masakrës së “21 Janarit” të vitit 2011 po të shprehemi me gjuhën e thjeshtë, s’kemi bërë asnjë gjë. Kështu që, drejtësia e re po nuk u mor me këto çështje që kërkojnë drejtësi, ku nga më kryesoret është gjaku i pafajshëm i katër të vrarëve në mes të ditës me duar në xhep, nuk është drejtësi. Pra, SPAK-u po nuk u mor me “21 Janarin” do të quhet Aspak dhe s’duhet për asnjë gjë. SPAK duhet të merret me treshen Berisha-Meta- Basha”, deklaroi socialisti Çela.
