Anëtar i kryesisë së PD, Eno Bozdo thotë se deklaratat e ambasadorit të OSBE, Bernard Borchardt nuk duhen të merren seriozisht, pasi vetë ambasadori me deklaratat e tij që ka bërë edhe më herët nuk është serioz.
Pyetje: Ka pasur një deklaratë të rëndësishme nga kreu i prezencës së OSBE në Tiranë, i cili është shprehur se zgjedhjet e 30 qershorit, edhe nëse opozita nuk do marrë pjesë do të njohen nga ODIHR?
Bozdo: Kështu është shprehur Borchardt edhe dy vite më parë kur deklaroi se ka 2 mld euro që vijnë nga qarkullimi i krimit të organizuar.
Është e kuptueshme që zotëria këto 2 mld euro i asocionet me qeverinë e Edi Ramës. Kështu kemi dëgjuar dhe deklarata të tjerë, nuk janë për tu marrë seriozisht përsa kohë zotëria vetë nuk është serioz me veten.
I ftuar në studion e lajmeve të Ora News, Bozdo foli edhe për opozitën e re.
Sipas tij, deklaratat e mazhorancës se po punohet me opozitën e re, janë tallje e kryeministrit Rama.
Bozdo: Është tallja e radhës që Rama i servir opinionit publik. Opozita e vërtetë ka braktisur parlamentin në shenjë proteste me një gjest vetësakrifikimi.
Kjo është opozita që në kushte të tjera do të ishte pjesëmarrëse në tryezën e reformës zgjedhore. E them tallje sepse këto deklarata jo vetëm acarojnë opinionin publik, por mua si qytetar më japin një sens të vështirë për tu kuptuar.
Sa kohë treçereku i qeverisë është asgjësuar dhe janë vendosur emra anonim, pra Rama tallet duke thënë se nuk keni nevojë për ministra, se jam vetë ministër dhe kryeministër. Nuk ka ndodhur që të kemi ca kalamaj për ministra. Kjo është e paparë.
Përsa kohë zgjedhim ca të mjerë që i futim në parlament me hir apo me pahir, me joshje dhe me forcë dhe pastaj thonë kjo është opozita e vërtetë, kjo është qesharake, është tallëse, është ofenduese.
