Mazhoranca socialiste ka ngritur dje alarmin se gjyqtarët dhe prokurorët kanë nisur pazare me vendimet para futjes në procesin e vetingut.
Duke folur në Parlament kreu i grupit parlamentar të Partisë Socialiste, Taulant Balla teksa deklaroi se për vitin që vjen në projektbuxhetin e ri është përcaktuar 53 milionë dollarë shtesë për reformën në drejtësi, pohoi se mazhoranca qeverisëse mbështet procesin e spastrimit të këtij sektori nga gjyqtarë e prokurorë të korruptuar.
Por pavarësisht vullnetit të shumicës për të çuara përpara reformën, zoti Balla zbuloi se shumë njerëz të drejtësisë që e dinë që do të ngelin në veting, po bëjnë kërdinë me proceset gjyqësore që kanë, pasi sikundër e theksoi ai, ata po bëjnë pazare korruptive në këmbim të vendimeve që do të japin.
Kështu që i ndodhur përpara kësaj situate të paprecedentë, numri 2 i PS kërkoi nga organet e drejtësisë që të nisin urgjentisht hetimet për këto fakte. Sipas tij, sistemi i drejtësisë duhet të vijojë me vetingun, për goditjen e çdo rasti kur gjyqtarë e prokurorë bëjnë pazare me drejtësinë. “Në këtë buxhet ne vazhdojmë të mbështesim reformën në drejtësi dhe çdo bashki në vend.
Tek Reforma në Drejtësi japim 53 milionë dollarë të tjera për 668 personel shtesë të punonjësve. Këtu gjej rastin të vazhdoj të shpreh mbështetjen e plotë për procesin historik të pastrimit të drejtësisë nga gjyqtarë e prokurorë të korruptuar, duke nxitur ecjen më tej të procesit të veting-ut dhe goditjen e çdo gjyqtari apo prokurori që vazhdon të bëjë Pazar me drejtësinë.
Të tilla janë rastet e fundit të zbuluara nga media në vend, ku gjyqtarë apo prokurorë në vetëdije të plotë të moskalimit të procesit të veting-ut, vazhdojnë të bëjnë tregti me drejtësinë. Këto akte të rënda nuk do të shpëtojnë pa ndëshkim. Pas procesit të veting-ut ata gjyqtarë e prokurorë me problematika të rënda në pasurinë e tyre do të ndiqen penalisht”, deklaroi ai.
