Kryeminsitrja Italiane Giorgia Meloni është liderja e parë që do të ketë mundësinë e negociatave dhe arritjes së një marrëveshjeje tregtare me SHBA, një tentativë që vjen në kulmin e klimës së kirjuar me luftën tregtare të tarifave të Donald Trump për BE dhe vende të tjera të botës.
Përpara nisjes në Uashingon, Meloni tha se situata është komplekse. Ajo iu drejtua qytetarëve me një mesazh ku tha se qeveria italiane do të vijojë përpjekjet që produktet dhe marketet italiane të gjejnë gjithnjë rrugën e tregjeve të tjera.
ANSA raporton se një ditë përpara nisjes Meloni zhvilloi një bisedë të gjatë telefonike me Ursula Von Der Leyen. Presidentja e Komisionit EVropian dhe shefja e qeverisë italiane kanë rakorduar në këtë telefonatë kërkesat evropiane ndaj SHBA ndërsa më herët është folur se propozimi kryesor do të jetë një zonë tregtare e lirë me tarifa doganore zero SHBA-BE në të dyja anët ë Atlantikut.
Por ky propozim duket se është hedhur poshtë në anën tjetër të negociatave, ato që po zhvillon komisioneri evropian për tregtinë me homologun e tij amerikan, ku siç raportojnë mediat italiane është bërë pak progres. Ndoshta rezultati kryesor do të kuptohet pas vizitës së Melonit, që do të jetë një vizitë edhe në rrafshin politik krahas atij ekonomik.
Trump I pezulloi tarifat reziproke ndaj mallrave evropiane për 90 ditë megjithatë rreziku I rikthimit të tyre mbetet aty. Në anën tjetër, lufta vijon mes SHBA dhe Kinës e cila përshkallëzohet nga dita në ditë.
Shtëpia e Bardhë njoftoi të martën se tarifat ndaj importeve kineze shkuan në 245% dhe vendimi erdhi për shkak të kundërpërgjigjes kineze. Ndërkohë sipas një deklarate të Shtëpisë së Bardhë, deri më tani 75 shtete kanë kërkuar negociata direkte me SHBA për çështjen e tarifave.
