Një operacion antidrogë i koduar “Menaxheri” ka zbuluar lëndë narkotike, kokainë, duke vënë në pranga dy persona.
Gjatë mbrëmjes së djeshme, nga ana e policisë së Durrësit është bërë arrestimi i 29-vjeçarit Taulant Lala 29 vjeç dhe i Adnand Bufit 22 vjeç, banues në Shkozet, Durrës.
Në lagjen Nr.14, Shkozet, Durrës pas vëzhgimit të dy të rinjve, të cilët udhëtonin me një mjet tip BMW, Taulant Lala dhe Adnand Bufi, pasagjer, në afërsi të vendit të quajtur “Ura e Dajlanit” kanë dalë nga mjeti.
Dy të rinjtë janë ndjekur nga policia e Durrësit pasi nuk i janë bindur urdhrit të punonjësve të policisë që të ndalojnë.
Gjatë kontrollit në automjet, u konstatua një vend i modifikuar tek kapaku i Airbag.
Gjatë këqyrjes nga ana e uniformave blu u gjetën dhe sekuestruan në cilësinë e provës materiale dy pako të mbështjella me plasmas transparent me peshë rreth 2 kilogramë lëndë narkotike e dyshuar e llojit kokainë.
Ndaj të dyshuarve hetimet janë në vijim, ndërkohë që materialet iu referuan Prokurorisë së Durrësit për veprat penale “Prodhimi dhe shitja e lëndëve narkotike” në bashkëpunim dhe “Mosbindja ndaj urdhrit të punonjësit të policisë së rendit publik”.
