Trupa e gjyqtarëve që do të gjykojë Sali Berishën është një rast i mirë për të kuptuar se si do të funksionojë drejtësia e re, kur të tre gjyqtarët janë mbështetës të Berishës, ndërsa kryetarja e trupit gjykues është edhe formalisht kushërira e parë e deputetes së Berishës Andia Ulliri.
Nëse do të kishim një rast të ngjashëm në gjykimin e Veliajt, Beqjas apo dikujt tjetër, që gjyqtarët të ishin kaq afër PS-së, madje në konflikt interesi, Berisha do kishte përmbysur dynjanë.
Sot, pasi mori vesh trupën gjykuese dhe u sigurua se ishte treshja “e artë” e tij, vazhdoi të sulmonte Irena Gjokën, gjyqtaren që preu masat e sigurisë, e cila nuk ka rol në gjykimin më tej të tij.
Normalisht, në traditën e tij, ai duhet të fillonte të shante me libër shtëpie zonjën Ulliri, por i ka goditur thuajse “motra” e deputetes së tij dhe një familje militante e PD-së. Dy të tjerët po ashtu.
Është pak a shumë sikur po paraqitet në Gjykatën e PD-së, drejtuar nga Adriana Kalaja. Dhe ky është një rast i mirë për të kuptuar gjithë sjelljen e Sali Berishës ndaj drejtësisë në Shqipëri.
Fillimisht kemi për të parë, nëse Berisha nga sot e tutje, do ta mbrojë mandatin e Arjan Ndojës në Durrës, të cilin e pretendon Andia Ulliri, “motra” e gjyqtares që kryeson trupin gjykues, apo jo?
Nuk është se ka shumë në dorë për të bërë në këtë pikë, se e ka në dorë KQZ-ja, por duhet parë sjellja e tij. Nëse e pyesje dje për këtë çështje, natyrisht do të thoshte: “Kjo çështje është e mbyllur”. Të shohim tani nëse do përmendë atë shprehjen e tij shfajësuese: “Çdo deputet ka të drejtë të kërkojë të drejtat e tij”.
Më tej kemi për të parë nëse ai hedhësi i shortit që është po ushtar i tij, i ka zgjedhur vetë me dorë me një marrëveshje paraprake, apo i ka zgjedhur i sigurt që i ka ushtruar dhe nuk ka bërë ende ndonjë pazar. Kjo do kuptohet nga mënyra se si Berisha dhe dhëndri do t’i trajtojnë ata. Nëse fillon e bëhet agresiv, është duke u treguar se ata duhet të reflektojnë shpejt dhe ta mbyllin gjyqin dhe jo ta zvarrisin duke pritur të fitojnë kohë. Nëse hesht si sot, atëherë duket që i ka vënë punët në terezi.
Dhe së fundmi, kur gjyqi të mbarojë dhe ata ta shpëtojnë, do të shikoni se ai do t’i lavdërojë si gjyqtarë trima dhe profesionistë, që u ndeshën me diktaturën e Edi Ramës dhe Altin Dumanit, por më në fund i qëndruan besnik parimeve të tyre.
Por e gjithë kjo ka të mirat e veta. E para që do kemi një proces gjyqësor që më në fund do pranohet nga Berisha, pasi, ashtu si dhe zgjedhjet, Berisha nuk pranon asnjë proces gjyqësor ku ai humbet.
Së dyti, do kemi një ballafaqim të autoritetit të SPAK me Gjykatën, e cila deri tani ka dëshmuar se është vetëm notere e SPAK dhe do krijojë një klimë që të diskutohet më qetësisht për veprat penale, sesa paragjykimi fillestar për to.
Dhe ajo që ka më shumë rëndësi, do të kuptojmë që drejtësia e re, sidomos Gjykata Antikorrupsion, është në shumicë e mbushur me militantë të Berishës, të cilët, përveçse përndjekin çdo të akuzuar që është kundërshtar me të, janë gati të pranojnë dhe çdo sulm të tij, mjafton që t’u jepet shansi t’i shërbejnë atij./Tema
