Debati i përjetshëm, se cili është futbollist më i mirë mes Lionel Messi dhe Cristiano Ronaldos, nuk është pa përgjigje, sipas Gary Lineker, që e ka përshkruar superyllin e Barcelonës mbi gjithë të tjerët.
Argjentinasi dhe potugezi kanë qenë dy lojtarët më të shquar të brezit të tyre, duke fituar plot 11 “Topa të Artë” mes tyre, gjatë 12 viteve të fundit. Messi po i afrohet ditëlindjes së 33-të, teksa ka shkëlqyer vetëm te Barcelona; ndërsa CR7 ka 35 vite mbi supe. Ky i fundit ka pasur sukses te Manchester United, Real Madridi dhe Juventus.
Të dy kanë fituar tituj të shumëfishtë në kampionatet respektive dhe Kupat e Europës, duke vendosur rekorde të reja të pashembullta në drejtim të golave dhe gjërave të tjera. Sidoqoftë, Lineker beson se Ronaldo mbetet pas kundërshtarit të tij të vjetër, për sa i përket aftësisë së përgjithshme. “Njerëzit bëhen shumë fisnorë, në të gjitha mënyrat në jetë. Edhe Messi kundrejt Ronaldos është një çështje, që kundrohet e tillë, – tha ish-sulmuesi i Barcelonës për “BBC Sport”.
– Shpesh zgjedhja duket se vjen nga mbështetësit e Barcelonës, Real Madridit, Juventusit, e kuptoj këtë. Unë jam një tifoz i madh i Ronaldos, gjithashtu, por nëse po flisni për lojtarin më të mirë ndonjëherë, nuk duhet as të debatohet. Ai është qartësisht Messi. Ky është vetëm mendimi im, por mendoj se përfaqëson shumë specialistë të tjerë”.
Lineker hodhi poshtë argumentet se arritjet e Ronaldos i tejkalojnë ato të Messit, për shkak të triumfit të tij në tri ligë të ndryshme të mëdha: “Mesi, padyshim ka luajtur në disa ekipe të shkëlqyera të Barçës, gjatë kohës atje, por, kushdo që ka qenë përkrah tij, numrat kanë thënë të njëjtën gjë. Ai i ka provuar përsëri e përsëri me statistika se është më i miri.
Edhe në dy sezonet e kaluara, kur skuadra e Barçës nuk ka qenë aq e fortë sa në të kaluarën, kontributi i tij nuk ka rënë. Në fakt, Barça është një rrëmujë e vërtetë pa të. Është e rrallë që çdo lojtar të qëndrojë vetëm me një klub tani, siç ka bërë Messi me Barcelonën. Mos harroni se ai u transferua atje nga një vend tjetër; la Argjentinën për Spanjën në moshën 13-vjeçare.
Nëse do të ishte larguar për ndonjë arsye, Messi do të akuzohej si i pabesë. Fundja, pse do të dëshironte të lëvizte, gjithsesi? Ai ka luajtur me një nga klubet më të mëdhenj të futbollit botëror. Nëse lini Barcelonën, ju kurrë nuk do të shkoni më lart”.
