Nuk kanë të sosur problemet për çmimin Nobel për Paqe Aung San Suu Kyi. Politikania që nga vitet ’90 të shekullit të kaluar e ka njohur botën me dhunën e ushtruar nga junta ushtarake e Myanmarit, vendit të njohur më parë si Birmani, është dënuar sërish me 5 vite burg nga regjimi ushtarak që në shkurt ka kryer një grusht shteti që mbylli një dekadë demokracie të brishtë në vendin aziatik.
Ish-kryeministrja e vendit, tashmë 76-vjeçare, akuzohet për korrupsion, dhe për përvetësimin e rreth 600 mijë dollarë dhe 11.4 kile ari. Por ky është vetëm dënimi i parë, sepse ajo akuzohet për krime zgjedhore, zbulim i sekreteve shtetërore dhe të tjera që mund t’i kushtojnë asaj dhjetëra vite burg, ndoshta dënimin e përjetshëm.
Disa nga bashkëpunëtorët e saj janë burgosur me dënime që shkojnë nga 20 vite deri në dënimin me vdekje, ndërkohë që shumë janë ata që kanë lënë vendin ose fshihen në zonat më të thella të vendit.
Burgu nuk është një risi për Aung San Suu Kyi. Nga viti 1988, ku për herë të parë doli në vëmendjen e opinionit publik ndërkombëtar si lidere e opozitës birmane, deri në 2010 ku u zgjodh deputete, Aung San Suu Kyi ka kaluar 15 të atyre 21 viteve në arrest shtëpie.
Fituese e zgjedhjeve në 2012 dhe 2016, ajo mori postin e Këshilltares së Shtetit, që në Myanmar është i barasvlershëm me atë të kryeministrit, deri në grushtin e shtetit të këtij viti.
Qeveria e saj nuk iu shmang dot kritikave, për korrupsion por edhe për heshtjen ndaj minoriteteve etnike në vend, veçanërisht masakrave të ushtarakëve që ajo kishte luftuar gjithë jetën ndaj popullsisë myslimane të Rohingya, heshtja që ka ftohur prej vitesh edhe marrëdhëniet e mbështetësve të saj në Perëndim.
