Real Madrid arriti të siguronte për të tretin vit radhazi finalen e Ligës së Kampioneve, edhe pse ka vuajtur shumë për t’u kualifikuar përballë Bajernit. Por edhe këtë ndeshje, polemikat nuk kanë munguar, ku gjermanët ndihen të “vjedhur” për shkak të gjykimit të gjyqtarit turk Çunej Çakir.
Pas përfundimit të ndeshjes, ish-gjyqtar spanjolli FIFA-s, Iturralde Gonzalez ka deklaruar se Çunejt Çakir ka gabuar në dy raste duke mos dhënë dy penallti në favor të skuadrës së Bajenr Mynih. Duke folur për të përditshmen “AS” dhe për “Cadena Ser” në Spanjë, ai ka analizuar ngjarjet më të diskutueshme të ndeshjes Real-Bayern.
Gonzalez ka dalë në përfundimin se rasti i minutave të fundit në pjesën e parë, kur Marcelo preku topin me dorë pas krosimit të Kimish, ishte penallti e pastër. “Marcelo ishte brenda zonës dhe prekja me dorë ishte e dukshme, duhej sinjalizuar penallti pasi krahu ishte i hapur”, u shpreh Gonzalez.
Sipas tij, edhe rasti i dytë, që i përkiste minutës së 52-të, kur kishte një kontakt në zonë mes Serxhio Ramos dhe Levandovskit, ishte penallti. “Ramos nuk godet topin por kundërshtarin, edhe në këtë rast duhej dhënë penallti për Bajern Mynih”, tha ish-gjyqtarit spanjoll, Iturralde Gonzalez.
