Humbja e gjyqit ndaj Britanisë së Madhe nga Doktori e mërziti shumë Mulin.
-Tani na duhet një strategji si të veprojmë, i tha Lelos.
Këta që na këshilluan ta hedhim në gjyq, sa na morën lekët.
Tani na thonë keni të drejtë ta apeloni dhe duan dhe po aq lekë.
Ne me aq lekë këtu, fitojmë zgjedhjet, ca t’u japim atyre.
-Tani që i hymë kësaj valleje, duhet ta çojmë deri në fund, tha Lelo.
-Faji është i imi, tha Muli.
Ti e di që unë jam në atë listë bashkë me Doktorin, dhe i thashë Doktorit lere ta hedh unë, se dhe po e humba unë nuk mërzitet njeri, por po e humbe ti, mërziten demokratet.
-Jo, më tha. Se vetëm unë mund ta fitoj atë gjyq, dhe po e fitova unë, e keni fituar të gjithë.
Më vuri në gjumë me këtë gjë.
-Është problem serioz, tha Lelo.
Duhet të themi që Rama ka korruptuar drejtësinë angleze.
Por duhet ta bëjmë pak të besueshme, se si e ka korruptuar.
-Atë e ka zgjidhur Doktori, tha Muli.
E ka thënë që drejtësia nuk arriti të luftojë korrupsionin e qeverisë angleze.
-Atëherë të propozojmë veting për drejtësinë në Britani, tha Lelo.
Të themi ata janë gjyqtarë që nuk kanë kaluar vetingun, jo si këto gjyqtaret që na dhanë vulën, që kishin kaluar të treja vetingun.
Ato janë gjyqtare, jo ai i Londrës pa veting.
-Kjo ngjit shumë, tha Muli, se ky vetingu është temë e ditës këtu.
Ja t’i them Gjin Gjonit të bëjë një deklaratë kundër drejtësisë angleze si më e korruptuara në Evropë..
Madje të thotë ndaj i nxorën dhe nga BE.
