Sherri i papritur mes presidentit Trump dhe Elon Musk e shqetësoi shumë Mulin.
– Na ra pika e parë e programit të 100 ditëve, i tha Lelos, që kishte si qëllim të gjenim një si Elon Musk, që të vendoste kontrollin mbi narkoshtetin.
Me këtë që i ndodhi Trumpit, duhet hequr dorë nga kjo pikë e programit.
Më mirë të mos hetohet asnjë krim i Edi Ramës sesa t’i japim dikujt pushtet për të hetuar dhe pastaj të na shantazhojë.
– E vërtetë është, tha Lelo.
Këta po zihen si Gaz Bardhi me Lul Bashën, pasi u ndanë.
– Edhe më keq, tha Muli.
Ai Musk ka përdorur pushtetin që i dha Trumpi për të hetuar dosjet, dhe tani po e shantazhon Trumpin.
Është njësoj sikur t’i japim ne dikujt pushtet për të hetuar Ramën dhe ai të zbulojë që i ka dhënë gjithë lejet Zenit, e pastaj të shantazhojë Doktorin.
– Skandal është, tha Lelo. Ke të drejtë.
Po shyqyr që nuk fituam, se do të ishim turpëruar tani.
S’do dinim me kë të bëheshim, me Trumpin apo me Muskun.
– Për atë s’ka dilemë, gjithnjë me kryetarin, tha Muli, por do na hapte telashe kot.
Do na çorodiste demokratët me lajme të rreme.
Shiko ç’i bën ky Trumpit, hedh dyshime që ka vrarë atë sekserin e femrave.
Merre me mend ç’mund të na bëjë neve ndonjëri, nëse gjen ndonjë sekser femrash.
– Lëre, kemi shpëtuar ngaqë nuk fituam, tha Lelo.
Duhet të jemi krenarë për këtë gjë, se do ishim bërë për turp.
