Muli ka vendosur më në fund të denoncojë Diellën në parlament. Akuza e tij është e mirë menduar. Me Diellën, Edi Rama ka kopjuar Doktorin me qytetarin digjital. Për t’u dukur më modern, ky e ka bërë digjital vërtet.
– Duhet ta denoncojmë! – i tha Lelos. – Qytetarja digjitale është kundër qytetarit digjital. Do të neutralizojë qytetarin digjital.
– Problemi është se nuk kemi ku ankohemi – tha Lelo – se qytetari digjital janë mijëra njerëz në një emër, kurse kjo është një emër që përgjigjet mijëra njerëzve.
– Nuk ka rëndësi! – tha Muli. – Më në fund Edi Rama u dorëzua tek shpikja e Doktorit. Duhet ta sulmojmë egër si antikushtetuese.
– Po e akuzuam për këtë – tha Lelo – dhe përgjigjja e saj ishte kjo: Kushtetuta flet për institucione që u shërbejnë njerëzve. Ajo nuk flet për kromozome, për mish apo për gjak. Ajo flet për detyra, përgjegjësi, transparencë dhe shërbim pa diskriminim. Këto janë masat me të cilat duhet gjykuar çdo ministër. Dhe unë ju siguroj – këto vlera i mishëroj po aq rreptësisht sa çdo koleg apo kolege njeri, ndoshta edhe më shumë.
– Çfarë t’i themi pas kësaj?
– Prit, prit, se duhet analizuar – tha Muli. – Po çfarë na di ajo ne një copë mish me dy sy që na përmend mishin dhe gjakun? Po këto kromozomet çfarë janë? Ça dmth që jemi kromë pa larë?
– Jo, e ka fjalën që ju jeni me mish e gjak, unë jam me bateri, por të tjerat i bëj më mirë se ju?
– Në asnjë mënyrë – tha Muli. – Nuk do pranojmë asnjë vendim të saj, asnjë firmë dhe nuk do njohim asnjë tender firmosur prej saj. Me atë Edi Rama mund t’u japë tendera gjithë biznesmenëve demokratë dhe na bien në dashuri me Ramën. Në asnjë mënyrë!
– Propozimi është që të detyrojmë Ramën të na bëjë dhe një deputet të opozitës robot dhe ta programojë sipas kritereve që t’i japë Doktori – tha Lelo. – Kështu ne kemi mundësi ta furnizojmë me të dhënat e qytetarit digjital dhe ajo harton planin si të fitojmë si opozitë. Vetëm kjo mund të na nxjerrë nga kriza, pasi na mëson strategjinë si mundet Rama dhe rivalizon me Diellën – tha Lelo. – Se ne si robot i kemi deputetët vetëm që i kemi budallenj tha. Robotët për robotë, të paktën t’i kemi të zgjuar.
