Në vigjilje të publikimit të librit të saj mbi origjinën e universit, shkencëtarja shqiptaro-amerikane shpjegon se si u ndikua nga Stephen Hawking dhe sundimi sovjetik.
Laura Mersini-Houghton lindi në Shqipëri dhe u rrit nën një regjim totalitar komunist i cili, deri në rënien e tij në vitin 1991, e shkëputi vendin nga pjesa tjetër e botës.
E ndikuar nga babai i saj, Nexhat Mersini, një matematikan, ajo zhvilloi një interes të madh për fizikën dhe, në 1994, fitoi një bursë për të studiuar në SHBA.
Libri i saj i parë, “Para Big Bengut”, përshkruan përpjekjen për të ndriçuar origjinën e universit tonë dhe për të provuar se ne jemi një nga shumë universet në një multivers shumë më të gjerë.
Mersini-Houghton tani është profesoreshë e fizikës teorike dhe kozmologjisë në Universitetin e Karolinës së Veriut, megjithëse aktualisht ndodhet në Cambridge, Angli, ku kalon çdo verë duke bërë kërkime.
Ajo në një intervistë për britaniken “The Guardian” thotë se për shkak të realitetit shumë të zymtë të Shqipërisë, njerëzit ishin më të etur për dije sesa tani në perëndim.
Kjo pasi kishte më pak shpërqendrime.
E pyetur se çfarë e tërhoqi te fizika teorike dhe kozmologjia në veçanti, ajo thotë se kishte ëndërruar për të marrë disa përgjigje: nga lindi universi dhe çfarë kishte përpara se të ekzistonte?
Për të, universi ynë është një kokërr e vogël pluhuri në një kozmos të bukur.
Dhe pse po studion hapësirën e pamatë të universit, ajo me një autoironi pranon se ka kohë pa vizituar Shqipërinë.
Por kjo nuk e ka penguar të mundohet për realizimin e disa projekteve të mbetura në tentativë.
“Unë dhe Stephen Hawking po organizonim një konferencë në Shqipëri. Ai ishte shumë i emocionuar për këtë, dhe gjithçka ishte në rregull por ai vdiq një muaj para se të ndodhte. E telefonoja çdo javë për të kontrolluar shëndetin e tij dhe pasi vendosëm ta anulonim”.
Mersinit i kujtohen fjalët e kryeinfermieres së tij që thoshte: Çfarëdo që të bësh, mos i thuaj se e ke anuluar konferencën në Shqipëri, sepse ai këtë e që e pret me padurim.
Gjë që në këtë univers nuk ndodhi kurrë!
