Mëngjesin e sotëm, një lajm i hidhur ka ardhur nga Cambridge, Angli, ku mësohej se ishte ndarë nga jeta në moshën 76-vjeçare, profesori i njohur Stephen Hawking. Teoricieni i fizikës ndërroi jetë në shtëpinë e tij.
Në bazë të disa deklaratave konfidenciale, redaksia e Tellalli ka mësuar, se shkencëtari i njohur botërisht ishte i ftuar për vitin 2018 në Tiranë. Nuk do ta besonit, por burimet pranë Bashkisë Tiranë kanë pohuar kohë më parë lajmin, por nuk thanë asgjë më shumë rreth eventit të rëndësishëm, as për të na shuar ndopak kureshtjen për dashamirësit e tij, që janë të shumtë edhe në vendin tonë.
Ky aktivitet, fatkeqësisht me ndarjen nga jeta të fizikantit nuk do mund të zhvillohet, duke sjellë kështu trishtim të madh për ata të cilët punuan për realizimin e këtij eventi, prej të cilit na u mohua nga ligjet e pashkruara të jetës, që ndryshe nga ato të fizikës nuk mund t’i parashikosh me hipoteza apo edhe me llogaritje, sa do gjeni që mund të jesh. Me keqardhje të madhe… Lamtumirë profesor!/Tellalli
Pak fjalë për fizikantin
Teoricieni më i mirë i fizikës së kohës së tij, Hawking shkroi qartë për misteret e hapësirës, kohës dhe vrimave të zeza sa që libri i tij “Një histori e shkurtër e kohës” u bë bestseller ndërkombëtar, duke e bërë atë një ndër shkencëtarët më të famshëm që nga Albert Einstein.
Edhe pse trupi i tij u sulmua nga një sëmundje neuronesh kur Hawking ishte 21 vjeç, ai habiti mjekët duke jetuar normalisht me sëmundjen fatale për më shumë se 50 vjet. Veprat më të famshme të Hawking përfshinin një model matematikor për Teorinë e Përgjithshme të Relativitetit të Albert Einstein dhe natyrën e universit si Big Band apo vrimat e zeza. Ai shkroi e bashkëshkroi 15 liibra në total. Lindi më 8 janar të vitit 1942 në Oksford të Anglisë.
Familja e tij kishte kaluar në Oksford nga veriu i Londrës për t’i shpëtuar kërcënimit të raketave të Luftës së Dytë Botërore. Talenti i tij i mrekullueshëm dhe metodat e studimit e bënin që ai të përdorte pak libra, të mos mbante shënime, por ende të zgjidhte probleme që askush tjetër nuk i zgjidhte. Stephen dëshironte të studionte matematikën, por lënda nuk ishte e disponueshme në kolegj kështu që ai zgjodhi fizikën në vend të saj.
