Zyrtarët federalë amerikanë thonë se kanë hapur një hetim ndaj ish-këshilltarit special Jack Smith, i cili drejtoi dy çështje penale federale kundër Presidentit Donald Trump, përpara se të jepte dorëheqjen nga posti i tij në fillim të këtij viti.
Zyra e Këshillit Special (OSC) konfirmoi për BBC se një hetim ndaj Smith është duke u zhvilluar, por nuk pranoi të shtojë detaje të mëtejshme.
Smith u emërua si këshilltar special në vitin 2022 për të hetuar keqpërdorimin e dyshuar të dokumenteve të klasifikuara nga Trump dhe përpjekjen e tij të dyshuar për të ndërhyrë në zgjedhjet e vitit 2020. OSC nuk ka autoritet për të ngritur akuza penale kundër Smith, por mund të fillojë veprime disiplinore ose t’ia referojë gjetjet e saj Departamentit të Drejtësisë.
LEXO EDHE:
Jakin Marena: Kriza në Kosovë dhe konflikti në Shkup, rrezikojnë efektin ‘domino’?!
Si një agjenci federale e pavarur, funksioni kryesor i OSC-së është të hetojë dhe adresojë shkeljet e rregullave federale nga anëtarët e shërbimit civil të SHBA-së.
Ajo vepron veçmas nga zyrat e këshilltarëve të posaçëm nën Departamentin e Drejtësisë – si ajo e drejtuar më parë nga Smith – e cila, ndryshe nga OSC, mund të ngrejë akuza penale federale nën Departamentin e Drejtësisë.
Media amerikane raportoi të shtunën se OSC po heton Smith për shkelje të dyshuara të Aktit Hatch, një ligj që ndalon aktivitetet politike nga zyrtarët qeveritarë.
Kjo vjen pasi Tom Cotton, një senator republikan nga Arkansas, i bëri thirrje OSC-së të hetojë Smith për “ndërhyrje të paparë në zgjedhjet e vitit 2024”. Smith u caktua nga ish-Prokurori i Përgjithshëm Merrick Garland në nëntor 2022 për të mbikëqyrur hetimet federale ndaj Trump.
Të dyja rastet që ai hetoi çuan në ngritjen e akuzave penale kundër presidentit, i cili u deklarua i pafajshëm dhe kërkoi t’i cilësonte ndjekjet penale si të motivuara politikisht. Çështjet u mbyllën më vonë pas fitores së Trump në zgjedhjet presidenciale në nëntor 2024, pasi rregulloret e Departamentit të Drejtësisë ndalojnë ndjekjen penale të një presidenti në detyrë.
Në një postim në X më herët këtë javë, Cotton i quajti hetimet dhe akuzat “asgjë më shumë se një mjet për fushatat e Biden dhe Harris”.
“Ka shumë të ngjarë të jetë aktivitet i paligjshëm fushate nga një detyrë publike”, shkroi Cotton.
BBC i ka kërkuar avokatit të Smith të komentojë mbi hetimin e OSC-së.
Hetimi i OSC-së vjen pasi Trump shkarkoi ish-kreun e saj, Hampton Delligner, në shkurt pasi Dellinger mbështeti rikthimin në punë të punonjësve federalë në periudhë prove të pushuar nga puna nga administrata Trump.
Një gjyqtar më vonë vendosi se shkarkimi i Dellinger ishte i paligjshëm, por një Gjykatë Federale e Qarkut vendosi që administrata Trump mund ta zëvendësonte Dellinger, ndërsa beteja e tij ligjore kundër shkarkimit të tij po kalon nëpër gjykata.
Dellinger braktisi çështjen ligjore në mars, duke thënë se nuk priste që Gjykata Supreme të vendoste në favor të tij.
“Ndërkohë, dëmi për agjencinë dhe ata që mbështeten tek ajo i shkaktuar nga një Këshilltar Special i cili nuk është i pavarur mund të jetë i menjëhershëm, i rëndë dhe, kam frikë, i pakorrigjueshëm”, paralajmëroi ai në mars.
Smith nuk është ish-zyrtari i parë qeveritar që hetohet nën administratën Trump.
Në maj, Shërbimi Sekret nisi një hetim ndaj ish-drejtorit të FBI-së James Comey pasi ai ndau dhe më pas fshiu një postim në rrjetet sociale me guaska deti që republikanët e pretendonin si nxitje për dhunë kundër Trump. Comey, i cili ishte drejtor i FBI-së nga viti 2013 deri në vitin 2017 nën Barack Obamën, i ka mohuar akuzat.
Më parë këtë muaj, media amerikane raportoi se Comey dhe ish-drejtori i CIA-s John Brennan ishin gjithashtu nën hetim për dyshime për dhënien e deklaratave të rreme në Kongres si pjesë e hetimit të tyre për ndërhyrjen ruse në zgjedhjet e vitit 2016.
Brennan më vonë i tha NBC-së se beson që hetimi ndaj tij është një “shembull i politizimit të vazhdueshëm të komunitetit të inteligjencës” nën Trump. /BBC/
