Nga sot, autostrada e parë e Kategorisë A në Shqipëri, Thumanë-Kashar, është e hapur për qarkullimin e automjeteve.
Autostrada është një koncension privat ku shteti është pronari i tokës dhe garantues në bankë ndaj shoqërisë ndërtuese “Gener”. Kjo do t’i dorëzohet shtetit e mirëmbajtur pas 35 vitesh shtrytëzim nga koncensionari. Taksapaguesit nuk kanë paguar asnjë qindarkë në këtë investim
Përfitues direkt të kësaj autostrade janë drejtuesit e automjeteve, që nuk do qëndrojnë më në trafik, zona, e cila merr një hov tjetër zhvillimi dhe, sigurisht, aeroporti ndërkombëtar “Nënë Tereza”.
Në këtë autostradë lejohet një shpejtësi prej 130 km/h, shpejtësi kjo që nuk lejohet (bazuar te tabelat) në asnjë aks tjetër.
Nëse dikush nuk do të përdorë rrugën me pagesë, do të ketë si alternativë lëvizjeje rrugët dytësore.
Kryeministri Edi Rama tha se kjo rrugë është një vend ku të gjithë ata që duan të prekin me syrin e imagjinatës se çfarë është Shqipëria e vitit 2030 mund ta shohin, pasi e gjithë rruga nga Muriqani në Vlorë do të jetë kështu.
Rama tha se autostrada Tiranë-Durrës do të zgjerohet, ndërsa rruga e vjetër e Ndroqit, do të jetë ajo që është, por do të jetë një rrugë panoramike.
“Kjo rrugë është një vend ku të gjithë ata që duan ta prekin me syrin e imagjinatës çfarë është Shqipëria 2030 mund ta shohin sepse brenda kësaj periudhe e gjithë rruga, nga lart në Muriqan e deri në Vlorë do të jetë kështu, ky është Korridori Blu dhe ndërkohë edhe Korridori i VIII do të jetë tërësisht i përfunduar e po ashtu, – pasi kam vënë re që ka shumë komente për pjesën e rrugës Tiranë-Durrës dhe pjesën e rrugës së vjetër të Ndroqit, – shumë shpejt do të fillojë edhe ai projekt dhe autostrada Tiranë-Durrës do të zgjerohet ndërkohë që rruga e vjetër e Ndroqit do të mbetet ajo që është, por do të jetë një rrugë turistike, panoramike, e cila do të mundësojë një kalim alternative, por dhe nuk diskutohet një qarkullim shumë më të këndshëm në atë segment. Edhe punimet për tunelin e Murrizit janë në rrugë të mbarë, pavarësisht problematikave të shumta me gjeologjinë e tokës.
Dhe një gjë tjetër, se ti drejton qarkun e Dibrës, por duke qenë se me dibranët rri përditë, mbase e ke merakun të menaxhuar në mënyrë të përditshme, unë i kam shumë merak dibranët se i kemi me shumë rëndësi për të gjithë atë zone, e cila tanimë po ndryshon përditë. E para, që tuneli i Murrizit është fiksimi por ndërkohë është një fiksim në luftë me gjeologjinë, prandaj nëse tuneli i Llogarasë filloi më mbrapa dhe mbaroi më përpara, kjo erdhi vetëm si rezultat i gjeologjisë.
Në Murriz ne po ecim dhe nuk duam të flasim, nuk duam të vëmë afate pasi nuk duam të kemi më befasira të gjeologjisë brenda tunelit, por nëse edhe fuqia e zotërve të Dibrës do të na ndihmojë, ne do kemi tunelin e Murrizit përpara përfundimit të vitit dhe të gjithë dibranët mund të mblidhen atje në sofrën e madhe dibrane për Vit të Ri. Ndërkohë që, e dyta, kam parë që është ndarë një lajm sipas të cilit rruga e Arbrit do të bëhet me pagesë. Rruga e Arbrit nuk do të jetë me pagesë, nuk do të ketë pagesë për rrugën e Arbrit” sepse është ndërtuar me PPP, u shpreh Kryeministri Rama.
Ministrja e Turizmit dhe Mjedisit Mirela Kumbaro tha se përvëç lehtësimit të komunikimit për komunitetin, në mënyrë të veçantë rruga i shërben turizmit.
“Praktikisht në tre portat hyrëse të Shqipërisë që vijnë nga veriu, vetëm për 5 muajt e parë, Murriqan- Han i Hotit dhe Morinë, ne kemi një rritje 15- 75 % krahasuar me vitin e kaluar që hyjnë nga kjo pikë, nga të gjithë, edhe nga rajoni sidomos ata që vijnë nga Europa, nga Kroacia edhe më tutje. Domethënë është një rrugë që i shërben patjetër komunitetit, por po të kemi parasysh fluksin në rritje të automjeteve, i shërben sidomos turizmit. Edhe për pasojë edhe komunitetit, që me hotelet, agroturizmet dhe bujtinat që ka në të gjithë zonën e veriut, do të furnizohet më shpejt, më mire, do të shpëtojnë nga pritjet e gjata”, u shpreh ajo.
