Prej disa javësh, në Tiranë dhe qytetet e tjera të vendit, ka nisur një aksion për çlirimin e trotuareve.
Kjo, pas urdhërit të Ramës.
Dhe në qendër të këtij aksioni, janë bërë lokalet.
Deri këtu, shumë mirë.
Por ajo që sheh në terren, është një non sens i madh.
Pronarët e lokaleve janë detyruar të heqin vetëm mbulesat dhe tendat e lokaleve, ndërsa karriget janë lënë siç ishin.
Pra trotuari vazhdon i zënë si dikur.
Është çliruar vetëm hapësira sipër, e cila shërben për t’i mbrojtur klientët e lokaleve nga shiu, i ftohti apo dielli.
Tani këta që e kanë nisur këtë aksion, ndoshta mendojnë që njerëzit ecin në ajër, jo në tokë, se nuk ka shpjegim tjetër që heqin atë që është sipër dhe jo ato që janë në trotuar.
Ose duhet të çlirojnë trotutaret, ose kjo që po bëjnë është një çmenduri.
Ndryshe, e vetmja gjë që po bëjnë, është falimentimi i një pjesë të mirë të lokaleve, atyre që punojnë ndershmërisht dhe nuk i kanë hapur për të pastruar lekët e drogës.
Sepse shumica e lokaleve, brenda kanë pak shumë ambiente dhe gjithë investimi i tyre është bërë në ambientet jashtë.
Për ato ambiente, për të cilat ata që kishin për detyrë për t’i kontrolluar, kanë marrë miliona lekë ryshfet.
Vetëm për një tendë lokali të vogël, inspektorët kërkonin 3 mln lekë në dorë, që të të linin ta vendosje.
Tani edhe lekët ua morën, edhe tendat ua hoqën, edhe rrugët nuk i çliruan, edhe bizneset e lokaleve rrezikojnë t’i falimentojnë.
