Sekretari i Përgjithshëm i Partisë Demokratike, Flamur Noka i drejton akuza SPAK-ut, duke e konsideruar këtë institucion aleat me qeverinë në krimin zgjedhor të kryer, sipas tij, në 11 maj.
“Ditën e premte u paraqita në SPAK për të sqaruar pozicionin e PD-së në lidhje me denoncimet që ka bërë ajo për krimin zgjedhor. Konstatova me shumë keqardhje, jo se nuk e prisja, që Task-forca e krimit zgjedhor, e ngritur me aq shumë bujë, kishte vdekur atë ditë që u krijua.
Megjithëse ne i kemi çuar të gjitha, sepse VKM-të janë provë, por jo. Ne i kemi çuar fakte edhe për krimin e organizuar, dhe për kartelet, por SKAP-i kërkon që ne t’i çojmë dhe numrat e telefonit të banditëve“, tha Noka.
Në një intervistë për RTSH, Noka risjell në kujtesë ngjarjen e Vorës, ku si ai, ashtu edhe deputetja demokrate Albana Vokshi, siç thekson, u përballën me sulme të paprecedenta të bandës së zonës.
“Ishte çdo gjë që u pa me zë dhe figurë. Zonja Vokshi u kërcënua me rrëmbimin e vajzës, pse kërkoi që banditët të dalin nga qendrat e votimit“, theksoi ai.
Sekretari i Përgjithshëm i demokratëve, Flamur Noka tha se Partia Demokratike do të bëjë avokatin e çdo akuze për farsën e 11 majit, me bindjen se i shërben vendit për të garantuar zgjedhje të lira.
“Ulërijnë se po nxihet Shqipëria. Jo, Shqipëria nuk po nxihet. Shqipëria e vërtetë sot bën transparencën“, shprehet Noka.
Por në fakt ishte Noka që kërcënoi sipas policisë
Specialistët për Hetimin e Krimit Ekonomik dhe Financiar në DVP Tiranë, pasi komunikimit me Prokurorin referuan materialet në Prokurori, ku nisi procedimi në gjendje të lirë për shtetasin F. N, me detyrë Sekretar i Përgjithshëm i Partisë Demokratike, për veprën penale “Kanosja, dhunimi ndaj pjesëmarrësve në zgjedhje”.
Procedimi në gjendje të lirë nisi pasi në bazë të kallëzimeve të shtetasve Xh. A., 29 vjeç dhe M. D., 33 vjeç, ky shtetas ditën e sotme, në Vorë, i ka penguar dhe kanosur për të ushtruar të drejtën e votimit. Materialet procedurale do t’i referohen Spak, për hetime të metejshme
