Shfaqet një krijesë misterioze në katakombet e Elbasanit. Duket se bëhet fjalë për një lloj të veçantë specjeje e cila jeton në tunelet e nëndheshme të këtij qyteti.
Fakti u bë i ditur nga një qytetar me banim në lagjen “Kala” poshtë banesës të së cilit ndodhen katakombe.
Qytetari tregoi për “Shekullin” se deri vonë e kishte të mbajtur hapur derën e tunelit të nëndheshëm e madje aty konservonte edhe ushqimet e dimrit. Por vite më parë i kishte vënë një derë sepse prej andej vinin insekte dhe erë e rëndë.
Një ditë gjatë kësaj vere ka vendosur ta hapë derën dhe pas saj ka parë diçka të pazakontë.
“Më shtyu kurioziteti ta hap derën e të shoh se çfarë bëhet pas saj. Kisha mbi 10 vjet që nuk e kisha hapur. Edhe kyçi ishte ndryshkur. Sapo e hapa, në një zgavër të tavanit më zunë sytë një krijesë të zezë të madhe. Ajo nuk lëvizi. I drejtova elektrikun për ta pikasur më mirë. S’më kishin parë sytë një të tillë deri më tani. Pastaj mora ca gurë të vegjël dhe nisa ta qëlloj. Fillimisht nuk luajti. Më pas lëvizi nga vendi. Nuk po e kuptoja çfarë ishte. Një kafshë fluturuese mes lakuriqit dhe një maceje. U habita nga ajo që pashë dhe pyeta disa miq të mi që marrin vesh nga kafshët dhe shpendët. Ata më thanë që mund të ketë qenë një lakuriq nate. Një nga ato llojet e vjetra që kushedi sa kohë ka që qëndron aty. E mbylla prap derën dhe nuk kam ndërmend ta hap më”.
Një nga specialistët e fushës në qytetin e Elbasanit shpjegoi se bëhet fjalë për një formë të veçantë të lakuriqit të natës i cili është më i madh se sa lakuriqi i zakonshëm dhe që jeton në katakombe apo shpella të nëndheshme. Këta lakuriqë ushqehen me insekte gjithashtu që jetonë nën tokë ndryshe nga lakuriqët e tjerë që ushqehen me insekte natën. Ky lloj i lakuriqit mendohet se është shumë i vjetër. Ndoshta ka qëndruar aty deri në 2000 vjet më parë, kohë kur u ndërtuan edhe katakombet në Elbasan.
