Pas përplasjes mes policisë dhe banorëve të Unazës së Re në mëngjesin e sotëm, përfaqësuesit e opozitës kanë dalë në mbështetje të këtyre të fundit duke dënuar dhunën e ushtruar.
Sipas tyre protestuesit kanë rënë pre e dhunës barbare shtetërore ndaj banorëve, përfshirë gratë dhe femijët.
Edi Paloka tha se Partia Demokratike ka një marrëveshje me banorët e Unazës së Re, ku ata do të kompensohen me vlerën reale të tregut për çdo dëm të bërë nga kjo qeveri.
“Edi Rama dhe Veliaj po e bëjnë këtë shkatërrim, këtë dhunë dhe terror vetëm për të futur disa miliona euro më shumë në xhepat e tyre të qelbur.
Projekti i Unazës është kapur në dhjetëra shkelje, falsifikime dhe akte korruptive.
Ata që i kane kryer këto akte janë në krye të shtetit, kurse banorët e shkretë dhunohen, burgosen, helmohen me gaz, bashkë me fëmijët. Gjysma e tyre, ose janë në spital, ose janë në burg” tha Paloka.
Ai shtoi se opozita do të vazhdojë të qëndrojë në mbështetje të banorëve të Unazës së Re, ndonëse kjo qeveri po sillet si Millosheviçi.
“Çfarë ndodhi në Kosovën e sulmuar nga Millosheviçi, që shqiptarët u detyruan të braktisin shtëpitë e tyre, ajo po ndodh këtu.
Këtu jemi ne dhe përballë kemi serbë.
Kemi dashnorin e Vuçiçit që e patë që u puth me të, ju thashë erdhi këtu të sulmojë shqiptarët dhe serbët që janë në shërbim të tij. Kjo është situata”, shtoi Paloka.
Klevis Balliu theksoi se qeveria po shkel Konventën për të Drejtat e Njeriut duke larguar me dhunë banorët nga shtëpitë e tyre pa asnjë dialog me ta.
“Është hera e parë në histori që disa qytetarë të thjeshtë mbizotëruan mbi pushtetin e krimit dhe të bandave dhe politikanëve të korruptuar kundër vjedhjes së 40 milionë eurove.
Edi Rama nuk ua fali kurrë dhe kjo ishte përgjigjja e tij ndaj tyre të cilët ia çorën maskën për të treguar se kush janë Edi Rama dhe Erjon Veliaj në realitet.
Edi Rama nuk ka më pushtet me të gjithë organizatën e tij të rilindjes”, theksoi Balliu.
Albana Vokshi dhe Dhurata Çupi vizituan të plagosurit në spital nga dhuna policore. Pasi u takuan me disa nga të lënduarit, Vokshi theksoi se banorët teksa po mbronin banesat e tyre janë dhunuar nga policia, janë lënduar duke u larguar nga gazi lotsjellës, të moshuarit kanë fraktura, zonjat kanë djegie të gradës së lartë për shkak të gazit që është përdorur mbi to.
“Askush nuk na jep informacion se ku janë duke u vizituar një pjesë tjetër e të lënduarve dhe sa është numri i saktë i tyre. Ka dhjetëra të arrestuar midis tyre edhe gra edhe vajza, të cilat janë dhunuar në mënyrë çnjerëzore. Nuk dihet se ku i kanë dërguar, në cilin komisariat.
Lajmin për arrestimin e kemi të konfirmuar nga banorët e lënduar”, tha Vokshi nga Spitali i Traumës, duke theksuar se opozita do të jetë pranë banorëve në çdo moment të protestës së tyre.
