Partia Demokratike dhe Lëvizja Socialiste për Integrim kanë mobilizuar militantët për të protestuar ditën e sotme para Parlamentit. Sot në orën 10:00 Kuvendi i Shqipërisë mblidhet në seancë plenare, ndërsa paralelisht me të jashtë godinës së Parlamentit opozita pritet të tubohet sërish.
Gazeta ka mësuar disa detaje nga organizmi që PD dhe LSI kanë bërë për këtë protestë, teksa mësohet se kryedemokrati Lulzim Basha në çdo takim që ka pasur me kryetarët e degëve dhe ish-deputetët ka kërkuar nga ta që të mbledhin sa më shumë militantë në protestën e sotme. Po ashtu, sipas informacioneve mësohet se Basha në porositë e tij ndaj vartësve ka kërkuar që të mbulohen shpenzimet për rrugën dhe ushqimin e militantëve që do t’i bashkohen protestës së paradites së sotme, ndërsa në asnjë rresht nuk ka kërkuar që tubimi të degjenerojë në dhunë.
Skenari “Gruevski”
Ndryshe nga Partia Demokratike, e cila duket më e moderuar, Lëvizja Socialiste për Integrim ka ndezur motorët duke mobilizuar bazën dhe militantët e saj që të përgatiten për “dhunë”. Mësohet se LSI, drejtues të saj, por edhe media pranë kësaj partie kanë rritur ndjeshëm ditët e fundit presionet ndaj Bashës, duke i kërkuar që sot para Parlamentit të mos heqë dorë nga revoltat.
Madje, mësohet se Kryemadhi dhe njerëz pranë saj, ia kanë bërë të qartë kryedemokratit që sot në tubim të aplikojnë skenarin maqedonas, me qëllim futjen e militantëve brenda godinës së Kuvendit dhe shkaktimin e dhunës. Ndërkohë që sipas informacioneve edhe militantët e Lëvizjes Socialiste për Integrim janë porositur që të njëjtin skenar të tipit “Gruevski” të aplikojnë edhe sot, ku si fillim duhet të çajnë kordonin e policisë dhe më pas të depërtojnë brenda godinës.
Nga ana tjetër ajo që e përforcon faktin se opozita, sidomos LSI ka një afeksion me dhunën lidhet ngushtësisht me protestat e fundit. Rreth tre javë më parë, protesta e opozitës degjeneroi në dhunë, ku disa militantët sulmuan në hyrje të Parlamentit disa deputet të mazhorancës, përfshi këtu ministrin e Mjedisit, Blendi Klosi. Ndërkohë që edhe seancën e fundit plenare opozita u përplas para Parlamentit me policinë, duke çarë kordonin dhe tentuar mësymjen brenda godinës.
Vasili thirrje për revolta
Lëvizja Socialiste për Integrim duket se kërkesën e saj për revolta nuk ia ka artikuluar vetëm Bashës, pasi një gjë të tillë ajo e ka bërë publike edhe dje. Ka qenë ish-deputeti Petrit Vasili, i cili gjatë një prononcimi për mediat iu bëri thirrje qytetarëve që t’i bashkohen protestës së sotme para Parlamentit, me qëllimirrëzimin e qeverisë. “Ka vetëm një zgjidhje, kjo është pikërisht protesta mbarë popullore në të cilën ne sërish do të jemi përpara Kuvendit, i cili në vend që të jetë Kuvendi i popullit është kthyer në Kuvendin e kusarëve. Asnjë qytetar nuk trembet nga kjo qeveri dhe pikërisht do jetë në sheshe sepse do çlirohet një herë e përgjithmonë prej tyre”, deklaroi Vasili.
Masat e policisë
Sot opozita ka paralajmëruar sërish zhvillimin e një proteste para Parlamentit, ndërkohë që brenda tij do të mbahet seanca plenare. Për këtë arsye, policia ka ndërmarrë planin e masave. Sipas informacioneve, në gatishmëri gjatë protestës do të jenë rreth 1200 policë, si dhe Forcat Shqiponja, Garda dhe FNSH do jenë të pozicionuar tek Kuvendi. Mësohet se perimetri i sheshit rrethues të Parlamentit do rrethohet me kordon hekuri, ndërsa pjesa e pedonales do të bllokohet me kordon skela, me qëllim bllokimin e militantëve të opozitës, në mënyrë që të mos tentojnë të mësyjnë brenda Parlamentit. Po ashtu, policia ka marrë masa edhe tek Kryeministria, duke i veshur dyert me llamarinë, pasi i druhet një zhvendosjes së protestës para kësaj godine. /Rigels Seliman
