OSBE ka hedhur poshtë të gjitha pretendimet e Partisë Demokratike dhe Lëvizjes Socialiste për Integrim, sa i takon zëvendësimit të mandateve në Kuvend. Basha, Kryemadhi dhe deputetë pranë tyre kanë akuzuar KQZ se po shkel ligjin, por për ambasadorin e OSBE futja e emrave të rinj në Parlament është procedurë legjitime.
Bernd Borchardt gjatë një prononcimi për media tha se kandidatët që pranuan mandatin iu përgjigjën zgjedhësve dhe ndërgjegjes së tyre, duke shtuar se ata do të qëndrojnë në Parlament deri në zgjedhjet e ardhshme parlamentare, më pas vendosin zgjedhësit për fatin e tyre. “Ky është një proces absolutisht normal. Hidhini një sy Kodit tuaj Zgjedhor. Ju ofrohet një vend dhe e keni ju në dorë ta pranoni apo jo. Sipas Kushtetutës suaj, deputeti nuk lidhet me asnjë mandat detyrues. Anëtarët e parlamentit janë, si në demokraci të tjera, të lirë.
Ata u përgjigjen zgjedhësve dhe ndërgjegjes së tyre. Më pas, zgjedhësi mund të vendosë për fatin e këtyre deputetëve në zgjedhjet e ardhshme”, tha ai. Ambasadori i OSBE deklaroi se reforma zgjedhore mund të votohet nga Parlamenti, teksa theksoi se për miratimin e saj duhen 84 vota dhe nuk dihet nëse deputetët e rinj në Kuvend do ta votojnë atë. Bochardt e konsideroi votimin të rregullt nga ana juridike, pasi edhe më herët vendimet në parlament janë marrë nga shumica.
“Për miratimin e reformës zgjedhore nevojitet një shumicë e cilësuar prej 84 votash. Ende nuk e di nëse deputetët janë të gjithë në favor të saj. Do të ishte e ligjshme që të votohej, por a do të ishte një vendim politik i mençur? Reformat tuaja zgjedhore janë votuar gjithmonë me shumicë shumë të gjerë dhe ne rekomandojmë fuqimisht për dialog lidhur me reformën zgjedhore”, u shpreh Bernd Borchardt.
Borchard: Shit-blerja e votës minon besimin e publikut
Ambasadori i OSBE Bernd Borchardt foli edhe për shit-blerjen e votës, ku sipas tij ky fenomen ka minuar besimin e publikut në zgjedhje. Gjatë zhvillimit të takimit të Tryeza e Dekriminalizimit, ai ka kërkuar nga aktorët politik që të bëjnë përpjekje serioze kundër këtij fenomeni, duke shtuar se OSBE do monitoroi nëse çështjet që denoncohen në Prokurori do të ndiqen në rrugë ligjore.
“Mendoj se Shqipëria ka edhe më nevojë për hapa të tillë përpara sot, kur akuzat politike për integritetin e zgjedhjeve minojnë besimin e publikut, si dhe njollosin procesin demokratik dhe pengojnë funksionimin e duhur të institucioneve. Sikurse theksohet në raportin e OSBE/ODIHR-it për zgjedhjet e përgjithshme të vitit 2017, autoritetet shqiptare duhet të trajtojnë me përparësi problemin e vazhdueshëm të akuzave të përhapura për shitblerje votash, të cilat kanë cenuar besimin e publikut në zgjedhje. Nevojiten përpjekje serioze nga të gjitha palët për të trajtuar këtë fenomen. Jemi duke monitoruar nëse çështjet që denoncohen në prokurori ndiqen vërtetë”, tha ambasadori i OSBE.
Zgjedhjet vendore
Bernd Borchardt foli edhe për zgjedhjet vendore të 30 qershorit, duke thënë se nuk ka dijeni nëse opozita do të marrë pjesë, duke shtuar se OSBE nxit pjesëmarrjen në zgjedhje, duke e quajtur si veprimin e duhur në demokraci.
“Në dijeninë time, as opozita dhe as opozita jashtëparlamentare nuk kanë vendosur ende nëse do të marrin pjesë në zgjedhjet vendore apo jo. Padyshim, ne nxisim fuqimisht pjesëmarrjen në zgjedhje. Ky është veprimi i duhur në demokraci”, tha Bernd Borchardt. /Elisjeda Kiko
