Pas djegies së mandateve nga opozita mësohet se një delegacion i Komisionit të Punëve të Jashtme të Parlamentit Europian do të vijë të mërkurën në Tiranë.
Ata do të informohen në detaje mbi situatën e re në të cilën është futur vendi, pas dorëzimit të mandateve parlamentare të opozitës dhe hapat që priten të merren në vijim.
Ky delegacion përbëhet nga deputetë të grupimeve të ndryshme politike të Parlamentit Europian.Në fillim mësohet se delegacioni i Parlamentit Europian do të takohet me kryetarin e Partisë Demokratike, Lulzim Basha, dhe Kryetaren e LSI-së, Monika Kryemadhi. Më pas takimet vijojnë me kryeministrin Edi Rama dhe ministrin e Jashtëm në detyrë, Gent Cakaj.
Delegacioni do të takohet edhe me Kryetarin e Kuvendit, Gramoz Ruçi, si dhe dy përfaqësues të shoqërisë civile, ndërsa nuk përjashtohen takimet me ministrin e Brendshëm dhe ministren e Drejtësisë.
