Partia Demokratike dhe Lëvizja Socialiste për Integrim janë me qëndrime të ndryshme sa i takon çështjes së ligjit të teatrit. Shtatori pritet që të rikthejë edhe njëherë përplasjet mes mazhorancës dhe opozitës pasi socialistët pas dekretit të presidentit Meta për të rikthyer edhe njëherë në Kuvend ligjin e teatrit, pritet ta rivotojnë sërisht atë.
Por kjo tentativë e socialistëve për të kaluar në votim sërisht ligjin për ristrukturimin e teatrit, ka bërë që LSI dhe PD të mbajnë qëndrime të ndryshme mbi aksionin politik që do të ndërmarrin gjatë shtatorit. Prej disa ditësh kreu i grupit parlamentar i LSI, Petrit Vasili ka bërë të ditur se Lëvizja Socialiste për Integrim do të ndërmarrë një aksion të fortë kundër qeverisë duke paralajmëruar edhe trazira. Mesazh që e përsëriti edhe dje teksa ishte i ftuar në një studio televizive.
Vasili tha se LSI nuk do të bëjë asnjë hap mbrapa pasi çështja e teatrit është më e gjerë sesa mendohet. “Ne nuk do të bëjmë asnjë centimetër mbrapa, jo më metër në lidhje me këtë çështje. Siç edhe nuk kemi bërë deri më tani. Ne kemi pasur një marrëdhënie të kushtëzuar me Parlamentin, jo bojkot, sepse nuk e kemi parë të udhëz që të bojkotojmë. Dhe kjo marrëdhënie e kushtëzuar, që sigurisht për një çështje parimore që nuk është teatri, është një simbolikë sepse argumentimi i presidentit na bëri të kuptojmë se çështja është shumë më e gjerë sesa kaq. Dhe sigurisht kjo gjë vlen për të pasur një qëndresë shumë më të fortë sesa kaq, në të mirë, në radhë të parë, të kushtetutshmërisë të këtij vendi por edhe të shtetit ligjor”, tha ai.
Sipas Vasilit, reflektimi i opozitës kundër qeverisë do të jetë shumë i fortë pasi çështja e teatrit ka tronditur themelet e shtetit ligjor. “Njëherazi teatri ka tronditur edhe themelet e shtetit ligjor pasi kuptuam që pushtete të caktuara që u rregulluan me ligj, me pushtete të caktuara, në radhë të parë siç është pushteti lokal, që pati dhe një reformë të madhe që do t’i jepte një autoritet të ri po poshtërohet. Jemi në një komunizëm të ri. Dhe aq më tepër që reflektimi do të jetë dhe shumë herë më i fortë sepse kemi dhe disa raporte shuam të forta të Departamentit të Shtetit amerikan, në mënyrë të veçantë për klimën e biznesit”, tha ai.
