Legjenda braziliane e futbollit Pele po vajton për vdekjen e rivalit të tij për “më të mirin e botës”, por dhe mikut të tij, Diego Maradona.
Pele i kushtoi një mesazh të veçantë dhe mjaft emocional Maradonës, të cilin e shkroi në profilin e tij zyrtar në Facebook. Maradona ndërroi jetë të mërkurën, 25 mëntor, pas ndërlikimeve shëndetësore.
“Sot është dita e shtatë që kur na keni lënë. Shumë njerëz kanë dashur të na krahasojnë ne dhe jetën sonë. Ju ishit një gjeni që magjepsi botën.
Një magjistar me një top në këmbë. Një legjendë e vërtetë dhe mbi të gjitha, për mua do të jesh gjithmonë një mik i madh, me një zemër edhe më të madhe.
Sot, unë e di që bota do të ishte më mirë nëse do të mund të krahasonim më pak me njëri-tjetrin dhe të ishim në gjendje të admironim më shumë njëri-tjetrin. Prandaj, dua të them se ju jeni të pakrahasueshëm.
Trajektorja juaj shënohet nga ndershmëria. Dhe në mënyrën tuaj unike dhe të veçantë na keni mësuar që ne duhet të mësojmë të themi ‘të dua’ shumë më shpesh dhe më shpesh.
Largimi juaj i parakohshëm nuk më lejoi t’ju them këtë, kështu që unë do të duhet të shkruaj: Të dua, Diego!.
Miku im i madh, faleminderit për tërë udhëtimin tonë. Një ditë, në parajsë, do të luajmë së bashku në të njëjtën skuadër.
Dhe kjo do të jetë hera e parë që unë do të ngre grushtin tim në shenjë triumfi në fushë, pa festuar një gol. Kjo, sepse më në fund mund të të përqafoj përsëri!”, shkroi Pele.
