Kampionati kombëtar i peshëngritjes u zhvillua sot në Tiranë, pikërisht në pallatin e sportit “Asllan Rusi”. Ishte një aktivitet me pjesëmarrje të bgjerë, por nuk u “respektuan” peshat fikse. Në të vërtetë u bë garë sipas peshës së sportistëve, një kategorizim i oritentuar nga Federata Shqiptare e Peshëngritjes.
Kampioni dhe sportisti më i mirë Briken Calja ngriti në shkëputje 148 kg, në shtytje 177 kg dhe në dygarësh 325 kg. Një rezultat në kuotat e tij maksimale të peshës trupore 69 kg, megjithëse Calja garoi në këtë aktivitet në peshën 73 kg. Peshëngritja ka nisur të operojë sipas një formati modern e standard, ku fituesit i nënshtrohen testit antidoping.
Theksojmë së fundmi se fituesit dhe më të mirët e këtij kampionati do të marrin pjesë në Kampionatin Botëror që zhvillohet në fund të këtij viti në Turkmenistan. Ambiciet e shtangës janë të sigurojë sa më shumë kualifikime për në Lojërat Olimpike të Tokios më 2020.
