Gazetari Artur Zheji pësoi arrest kardiak teksa po festonte ditëlindjen e djalit të tij, Patrik, në një restorant në rrugën “Butrinti” në Sarandë.
Miqtë e tij tregojnë se Zheji vuante edhe nga diabeti. Atij iu dha ndihma e parë dhe u nis me urgjencë drejt spitalit, por për fat të keq nuk arriti t’i mbijetonte goditjes në zemër.
Vdekja e tij e parakohshme ka tronditur thellë opinionin publik, teksa të shumtë janë gazetarët dhe politikanët që kanë reaguar.
Kryeministri Edi Rama, shkroi në reagimin e tij: Lamtumirë mik kohësh të tjera dhe e gjetsh matanë paqen për shpirtin.”
Kryetari i PD-së, Sali Berisha, shkroi: Homazh për Artur Zhejin!
Miq, gazeteri, analisti, botuesi, publicisti i mirënjohur Artur Zheji mbylli sot, papritmas dhe parakohe, sytë përgjithmonë. Duke shprehur ngushëllimet e mia më të ndjera familjes, miqve të afërmëve, unë lutem së bashku me ta që shpirti i Arturit të tyre të dashur të gjejë paqen e merituar. Amin.”
Ministri Taulant Balla shkroi, “Shumë, shumë i trishtë lajmi për ndarjen e parakohshme të gazetarit Artur Zheji. U prehsh në paqe mik!”
Kreu i Partisë së Lirisë, Ilir Meta nga qelia tha se “është trishtim i madh kur një mik dhe një profesionist si ai humbet jetën në mënyrë kaq të papritur dhe në kulmin e pjekurisë jetësore dhe profesionale. Një humbje e madhe dhe e pazëvendësueshme, jo vetëm për familjen e tij, por edhe për komunitetin e gazetarëve, me të cilët ndaj ngushëllimet e mia më të sinqerta!”
Erion Veliaj, kryebashkiak i Tiranës, po ashtu nga qelia shkroi mesazhin: Lajm fort i hidhur ndarja nga jeta e Artur Zhejit! Ngushëllime familjes, të afermve, miqve e kolegëve për humbjen e rëndë të gazetarit dhe publicistit të shquar, që i dha shumë medias shqiptare nga vitet ‘90 e deri sot.
Arturi ishte një intelektual i spikatur, një mendje kritike dhe një gazetar kalibri që do t’i mungojë shumë publikut. Prehu në paqe mik i mirë!”
Sekretari i Përgjithshëm i PD-së, Flamur Noka: “U prehsh në paqe Turi! Ikja e beftë na le me dhimbje. Ngushëllime familja sate!
Për pak ditë do të festonit ditëlindjen tënde, e ne miqtë e tu do të të uronim 64-vjetorin. Ke shume kujtime pas, si drejtues e gazetar, si prind, miq e mik. Artur Zheji ishte biri i dy shqiptarëve të shkëlqyer, i zagoritit të gjithëditur Petro Zheji dhe i aktorëve të mirënjohur Besa Imami. Trashëgoi kulturën e tire dhe spikati si personazh në prime.”
Analisti dhe gazetari Martin Leka shkruan se është pa fjalë: “Pa fjalë! Lamtumirë o Tur Zheji! Nuk ishte koha për të ikur o shoku im!”
Gazetari dhe drejtuesi i OPINION, Blendi Fevziu, duke kujtuar bashkëpunimin e gjatë me të, shkroi: “Artur Zheji u nda nga kjo botë papritur, në kulmin e energjive dhe angazhimit publik. Bashkë me të iku një zë autoritar i medias dhe një intelektual i rrallë. U prehsh në paqe, Tur!”
Edhe gazetari Enkel Demi reagoi me dhimbje: “Pa fjalë… Më vjen shumë keq për Turin, fëmijët dhe bashkëshorten e tij.”
Analisti Ilir Kulla ndau një kujtim personal: “Para pak ditësh pimë kafen e fundit dy orëshe me Zhejin, duke folur për planet e të ardhmes. Ja që Zoti paska pasur plane të tjera.”
Teatri Kombëtar shpreh dhimbjen për ndarjen nga jeta të Artur Zhejit i cili jo vetëm si gazetar, por edhe publicist dhe dramaturg ka lënë gjurmë në skenën teatrore shqiptare.
“Në krijimtarinë e tij, fjala u bë reflektim i kohës dhe i shoqërisë, duke pasuruar jo vetëm medien dhe debatin publik, por edhe skenën tonë kombëtare. Kujtimi i tij do të mbetet i gjallë në historinë e artit dhe kulturës sonë. Ngushëllime të sinqerta familjes, miqve dhe gjithë komunitetit artistik”, thuhet në mesazhin e Teatrit Kombëtar.
