Skandalet në ndërtimin e segmenteve të Unazës së Re në Tiranë nuk kanë të mbaruar. Kompania Salillari që ka marë të drejtën e ndërtimit të dy loteve në këtë projekt duket se do të mbykqyret nga kompania IKN me të cilën ka lidhje financiare.
Kjo firmë mbikëqyr punimet edhe në Milot-Morinë e cila po menaxhohet dhe mirëmbahet nga Salillari.
Tenderi i Unazës së Madhe vazhdon të ketë pikëpyetje të mëdha. Tashmë kompania Salillari përveç se ka përfituar të drejtën e ndërtimit të dy loteve, do të mbikëqyret nga një kompani me të cilën ka lidhje financiare.
Sipas dokumenteve rezulton se IKN ose Instituti i Konsulencës në Ndërtim është kompania që tashmë kryen mbikëqyrjen e punimeve në Milot-Morinë.
Ky projekt po ashtu është në ndërtim nga kompania Salillari, e cila paguan 50% të shumës për punën që ajo kryen. Por hijet më të mëdha nuk janë këto pasi kompania IKN u skualifikua pas vlerësimeve teknike dhe në vend të parë u rendit ‘Gjeokonsult & Co’.
Por ky vendim u ankimua në Komisionin e Prokurimeve Publike dhe si rezultat Autoriteti Rrugor Shqiptar ka renditur në krye të listës kompaninë Instituti i Konsulencës në Ndërtim, duke e bërë fituese për të mbikëqyrur punimet për ndërtimin e segmentit të Unazës së Re.
Në bazë të ligjit për kontrollin dhe disiplinimin e punimeve të ndërtimit kompania që mbikëqyr punimet nuk duhet të ketë asnjë lidhje me kompaninë që zbaton projektin.
Po ashtu në bazë të kontratës “shërbime konsulence për inxhinier të pavarur për projektin e koncesionit të autostradës Milot-Morinë”, IKN paguhet 50 % me fonde të buxhetit të shtetit dhe 50 % nga kompania koncesionare fakt ky që tregon lidhjen financiare midis dy kompanive.
Një tjetër fakt është se në ë janar të 2018 kjo kompani ka regjistruar zyrat në pallatin Salillari dhe po e njëjta adresë është hequr në 25 janar të 2018. Edhe pse nuk është lidhje e drejtpërdrejtë, sërish edhe kjo ngre një tjetër pikëpyetje.
