Largimi i Fatmir Xhafajt ka rikthyer përplasjet mes presidentit Ilir Meta dhe kryeministrit Edi Rama. Shefi i qeverisë ka propozuar për ministër të Brendshëm, Sandër Lleshin, por Ilir Meta prej më shumë se 5 ditësh e mbanë në tryezë kërkesën dhe nuk e dekreton. Mirëpo, gazeta ka mësuar se presidenti po e vonon dekretimin, pasi pretendon se ka disa përplasje ligjore që duhet të zgjidhen. Edhe pse Lleshi e ka mbyllur karrierën në ushtri që pas përplasjes me Nishanin, juristët e Metës pretendojnë se ai është ende funksionar dhe nuk mund të bëhet dekretimi. Sipas Kushtetutës, një ministër nuk mund të ushtrojë asnjë funksion tjetër shtetëror. I gjithë problemi sipas Presidencës, qëndron te fakti se ka një vendim gjyqësor ndaj Lleshit dhe duket se kjo po përdoret si manovër për të bllokuar dekretimin e tij. Presidenca ka kërkuar nga Ministria e Mbrojtjes informacion nëse Lleshi është apo jo në detyrë. Por sinjalet janë se kjo është një lëvizje për të futur në ngërç qeverinë.
Përplasja me Nishanin
Gazeta ka bërë një kërkim të të gjithë përplasjeve mes Lleshit dhe Nishanit. Ish-presidenti me anë atë dekretit 8189 datë 21.05.2013 e ka liruar Sandër Lleshin nga detyra e zv/Shefit të Shtabit të Përgjithshëm të Forcave të Armatosura. Por një lëvizje e tillë u cilësua e padrejtë nga Lleshi, i cili ju drejtua gjykatës. Pas 8 muajsh, Gjykata e Tiranës e ka cilësuar të drejtë kërkesën e Lleshit dhe ka rrëzuar dekretin e Nishanit. Në vendim u vendos: Pranimin e kërkesë-padisë; Anulimin e Dekretit Nr. 8189 dt. 21. 05. 2013 të Presidentit të Republikës së Shqipërisë; Anulimin e Urdhrit Nr. 1093 dt. 27. 05. 2013 të Ministrit të Mbrojtjes së Republikës së Shqipërisë; Detyrimin e palës së paditur Ministria e Mbrojtjes t’i paguaje paditësit Sandër Lleshi, pagën nga data 27. 05. 2013 deri në ditën e sistemimit të paditësit në një detyrë në përputhje me gradën që mban. Shpenzimet gjyqësore në ngarkim të palës së paditur Ministria e Mbrojtjes. Ajo që do të dijë Presidenca është nëse Lleshi pas këtij vendimi është kthyer në detyrë apo jo. Në fakt vetë ai ka deklaruar se Nishani e hodhi në rrugë dhe nuk u kthye në detyrë. Gazeta ka mësuar se Presidenca ka filluar të kapet pas dy elementëve. E para nëse Lleshi ka vijuar të marrë pagë gjatë kësaj kohe që nuk është sistemuar dhe e dyta është që Nishani ka deklaruar se e ka nxjerrë atë në rezervë. Por e gjitha duket se është lëvizje strategjike, pasi është nëse Lleshi është në detyrë në ushtri, ai mund të japë direkt dorëheqjen dhe gjithçka zgjidhet.
Berisha mesazhe Metës
Propozimi i i Sandër Lleshit për ministër të Brendshëm ka vënë në alarm partinë Demokratike dhe ish-kryeministrin Sali Berisha. Media pranë tij dhe vetë “Rilindja Demokratike” prej disa ditësh po e godet fort Lleshin dhe i ka dërguar disa, mesazhe Ilir Metës të bllokojë dekretin. “Skandali duket se nuk priti sa të fillojë detyrën e re Ministri i Brendshëm, i zgjedhur me nxitim nga Kryeministri Rama. Kandidati për ministër ka një handikap që i ka “shpëtuar” syrit të Kryeministrit Edi Rama, i cili ka nxjerrë në Twitter propozimin e tij. Të shohim nëse do i shpëtojë edhe Presidentit Ilir Meta, apo nëse dhe ky i fundit me vetëdije do të vendosë të mbyllë njërin sy para të kaluarës së errët të ministrit të skandaleve të radhës”, deklaronte dje RD. Pra duket se Berisha dhe PD po i dërgojnë mesazhe Metës që të fusë në ngërç qeverinë./Kliti Topalli
