Deputeti i Lëvizjes Vetëvendosje, Dimal Basha, u zgjodh kryetar i Kuvendit të Kosovës. Pro kandidaturës së tij votuan 73 deputetë, duke kapërcyer kështu ngërçin instucional paszgjedhor në Kosovë.
Pro kandidaturës së Bashës votuan edhe një pjesë e deputetëve të Partisë Demokratike të Kosovës, krahas tre deputetëve të Aleancës për Ardhmërinë e Kosovës. Kundër zgjedhjes së tij votuan 30 deputetë, përfshirë ata të Lidhjes Demokratike të Kosovës.
Biografia e kryetarit të ri të Kuvendit të Kosovës:
Dimal Basha ka lindur më 12 tetor 1979 në Prishtinë dhe jeton në qytetin e Ferizajt.
Studimet e larta i ka përfunduar në “John Jay College of Criminal Justice” në New York, duke diplomuar me vlerësimin më të lartë në drejtimin “E Drejta Penale Ndërkombëtare.”
Dimali gjithashtu ka përfunduar studimet Master në Marrëdhënie Ndërkombëtare, me fokus në “Konflikt dhe Siguri,” në Universitetin “The New School University,” po ashtu në New York.
Me një përvojë të pasur profesionale, Dimali ka punuar në zyrën e ish-kongresmenit Eliot Engel, si dhe si analist i të Dhënave Kualitative në Gjykatën Federale të ShBA-së.
Përveç kësaj, ai ka ushtruar një karrierë të suksesshme menaxheriale në Angli dhe ShBA.
Në politikë, Dimal Basha ka shërbyer si deputet i Kuvendit të Republikës së Kosovës për dy mandate, duke përfaqësuar Lëvizjen Vetëvendosje!
Ai ka qenë anëtar në Komisionin për Punë të Jashtme, Komisionin për Legjislacion, Komisionin për Mbikëqyrjen e AKI-së dhe Komisionin për Stabilizim-Asociim.
