Prokurori Ramadan Troci pritet të dalë ditën e premte para Komisionit të Pavarur të Kualifikimit për t’iu nënshtruar Vettingut. Prokurori i Prokurorisë së Përgjithshme do të dalë para trupës gjykuese të KPK, që përbëhet nga Pamela Qirko, Genta Tafa dhe Suela Zhegu.
Kjo trupë do të njohë Ramadan Trocin me gjetjet e hetimit të shtyllave kryesore të Vettingut, të cilat janë pastërtia e figurës, aftësitë profesionale dhe burimi i të ardhurave.
Pranë Komisionit të Pavarur të Kualifikimit janë depozituar tre raporte për ligjshmërinë e pasurisë, pastërtinë e figurës dhe aftësitë profesionale të prokurorit Troci. Raportet janë dorëzuar respektivisht nga Inspektoriati i Lartë të Deklarimit dhe Kontrollit të Pasurive, Drejtoria e Sigurimit të Informacionit të Klasifikuar dhe Këshilli i Lartë i Drejtësisë.
Prokurori Ramadan Troci është i njohur për arrestimet që ka kryer. Ai ka firmosur për arrestimin e ish-Guvernatorit të Bankës së Shqipërisë Ardian Fullani pas skandalit për vjedhjen e 713 milionë Lekëve, si dhe për ish-kryetarin e Bashkisë së Vlorës, Shpëtim Gjika. Fullani dhe Gjika u liruan më pas nga Gjykata.
