Afrimi i zgjedhjeve parlamentare të 25 prillit të vitit 2021, pritet të ndezë ashpër luftën politike në vend.
Të gjitha partitë politike janë përfshirë nga ethet e parakohshme të fushatës zgjedhore, ndërsa kanë nisur të bëjnë llogaritë dhe madje kanë nxjerrë edhe “shpatat nga këllëfët”, duke i treguar njëri-tjetrit muskujt.
Ndërkohë protagonist në arenë politike është bërë edhe presidenti Ilir Meta, i cili është zhveshur nga kostumi i kreut të shtetit dhe po bën politikë të fortë. Meta në çdo dalje publike dhe në çdo reagim mediatik, vijon sulmet ndaj qeverisë, duke e kërcënuar këtë të fundit se në 25 prill për të do të jetë dita e gjykimit.
Skandali i pasaportave do të rihapet
Por paralelisht presidenti Meta ka rënë edhe pre e skandaleve të bërë nga vetë ai. Një prej tyre është edhe ai i dhënies së shtetësive pa kriter, pasi ka pajisur me shtetësi shqiptare në shkelje të ligjit shumë persona. Ky skandal i përmasave të mëdha u denoncua në media, ndërkohë që sapo u njoh me këtë çështje mazhoranca u vu menjëherë në lëvizje, ku përmes Komisionit të Sigurisë ka nisur hetimin për kreun e shtetit.
Gazeta e deklaroi pak ditë më parë se ky komision iu kishte dërguar shkresa për të marrë informacione plot 14 institucioneve. Arsyeja kryesore pse është shtrirë hetimi në kaq shumë institucione është se skandali me shtetësitë është një çështje me ndjeshmëri të lartë.
Por në kushtet kur sesioni parlamentar për këtë vit është mbyllur dhe në një kohë që duket se kjo se kjo çështje ka humbur dhe nuk është më në vëmendjen e publikut, gazeta ka mësuar se Komisioni i Sigurisë po punon fort në prapskenë për të “gozhduar” presidentin Meta. Burime të sigurta i pohuan gazetës se Partia Socialiste ka një plan rezervë përballë presidentit para zgjedhjeve, pasi pritet që të hapë skandalin e pasaportave.
Gati dosja
Mësohet se aktualisht në tryezën e Komisionit të Sigurisë janë dosjet me përgjigjet e kthyera nga rreth 10 institucione, ndërkohë që mësohet se mazhoranca do ta çojë deri në fund hetimin e këtij skandali për të nxjerrë përgjegjësinë dhe rolin e Metës.
Në këtë kontekst, mësohet se Komisioni i Sigurisë është duke i kopsitur dosjen e aferave për pasaportat kreut të shtetit, të cilën pritet ta bëjë publike në fillim të muajit shkurt. Pra duket se PS po shkon me plane rezervë përballë presidentit Ilir Meta para zgjedhjeve parlamentare të 25 prillit. Mirëpo nuk ndalet me kaq, pasi Komisioni i Sigurisë jo vetëm që është i vendosur për të çuar deri në fund hetimin me skandalin me shtetësitë, por ka në plan që të fusë në lojë edhe Strukturën e Posaçme Kundër Krimit të Organizuar dhe Korrupsionit, në rast se shkeljet e presidentit Ilir Meta janë të rënda.
Mësohet se gjatë krahasimeve që do t’i bëhet dokumentacionit voluminoz të ministrive me ato shtetësisë që ka dhënë kreu i shtetit, dhe nëse do të dalin se shumicën e shtetësive e ka dhënë Meta, për individë që nuk janë biznesmenë apo personalitete të dobishme për vendin, por janë njerëz të dënuar, do të hyjë në lojë SPAK për hetime më te thella. Kjo pasi i bie që Meta i ka dhënë shtetësitë sipas dëshirës së tij. Megjithatë, mbetet të shihet në ditët në vijim se çfarë do të ndodhë më konkretisht.
