Kryeministri Edi Rama gjatë fjalës së tij në Kuvend, ka thënë se Ilir Meta ka ende kohë të ndryshojë mendje për Sandër Lleshin, edhe pse tashmë afati ligjor ka skaduar.
Ai ndërkohë, duke komentuar fjalët e njerëzve të Metës, se ky i fundit po e sfidon, tha se nuk do të donte ta besonte këtë, pasi nuk mund ta pranojë një president qesharak.
“Përmes një gazetari në një klub, mora vesh se mbrëmë paska hedhur dorashkën e sfidës.
Mos qoftë ajo që unë ende nuk e besoj që ma kanë dëgjuar veshët në takimin me të, madje pranoj që të kem probleme me veshët, sesa të pranoj atë që më ka thënë vetë ai dhe të na rrëfejë me dyer të mbyllura a të hapura, a me ne a gjysmën e familjes sonë politike në Kuvend, gjithçka që e ka mbajtur përmenda me shumë gjasë pa arritur dot në sy, por mos qoftë ajo që ma ka thënë mua.
Gjithçka e pranoj, por një president qesharak nuk e përballoj dot. Koha më ka mësuar që të mos e them fjalën e fundit të parën.
Sot të votojmë shkarkimin e Xhafës, që e falënderoj për bashkëpunimin, më pas votojmë në qeveri ministrin e Brendshëm, si zv.ministër, që e refuzoi presidenti, dhe do t’i japim presidentit kohë që ta bluajë këtë çështje dhe të punojë për të krijuar bindje të plotë por edhe vetes”, tha Rama.
