Kryeministri Edi Rama ka reaguar dje për herë të parë mbi atë që ndodhi ditën e djeshme në Kuvend. Opozita bllokoi punimet, ndërsa Rama në një intervistë nuk ndali ironitë dhe akuzat.
Ai theksoi se nuk e ka ndjekur fare atë që ndodhi në Kuvend, por u informua pasdite. Nga ana tjetër Rama u është rikthyer sulmeve ndaj opozitës dhe veçanërisht ndaj Sali Berishës dhe Lulzim Bashës. Kryesocialisti theksoi se Berisha përfaqëson botën tjetër, duke mbyllur çdo derë bashkëpunimi me të.. “Përfaqësuesit e këtyre njerëzve është detyra e atyre që janë atje, jo unë. Unë i përfaqësoj si kryeministër. Se kush i përfaqëson në atë sallë nuk e zgjidh unë.
Sa më takon mua unë e kam thënë se ai është përfaqësues i një bote tjetër. Berisha përfaqëson botën tjetër. Edhe Basha përfaqëson pjesën e një çorbe interesash. Ata mund të ndahen dhe ribashkohen, ne nuk mund ti vijmë nga pas”, deklaroi ai. Kryeministri Edi Rama ka vijuar me kritikat ndaj Albin Kurtit. Raport mes tyre duket qartë se janë ftohur ndjeshëm dhe kryeministri vijon t’i mëshojë idesë se Kosova del më e humbur nëse i bën bisht dialogut me Serbinë. “Çdo kthim pas është në dëm të Kosovës. Nuk është në dëm të Serbisë”, u shpreh ai.
Sakaq, ai foli për herë të parë edhe për ngjarjen e shëmtuar në stadium, ku Rama dhe Kurti ishin në zona të ndara. Kryeministri u shpreh se Kurti dhe protokolli nuk e kishin informuar se do ishte aty. “Kisha 3 vendet që kisha vetë. Mu nuk më informoi askush. Në boksin e veçantë ishte jo vetëm Albini, por dhe një pjesë e anëtarëve të qeveri së Kosovës dhe zv.kryeministri i Maqedonisë, ishte dhe zv/kryeministrja jonë.
Unë kur shkojë në Kosovë i njoftoj të gjithë dhe kush më pret me pret, kush s’më pret s’më pret”, nënvizoi ai. Duke u ndalur te deklarata e presidentit të Francës Macron për vizat e Kosovës, Rama tha se qeveria e Kosovës duhet të përfitojë nga javët në vijim.
Kreu i qeverisë zbuloi se për këtë çështje qeveria e Kosovës nuk i ka kërkuar mendim, ndërsa tha se vendimi i takon kryeministrit të Kosovës nëse duhet të vijojë me planin Franko-Gjerman apo të vijoj të kundërshtojë ndërkombëtarët. Sipas Ramës, qeveria e Kosovës duhet bashkëpunojë më shumë me ndërkombëtarët dhe të plotësojë kushtet që ata kërkojnë.
