Kryeministri Edi Rama ka dhënë një intervistë për radion britanike Times Radio Politics, ku ka folur për zgjedhjen e ministres së parë virtuale në qeverinë shqiptare, Diella, një figurë e krijuar me inteligjencë artificiale (AI), e cila sipas tij përfaqëson një hap të guximshëm drejt modernizimit të administratës publike.
“Së pari, kurrë nuk mund ta dini nëse po flisni me mua apo me një version timin me inteligjencë artificiale,” u shpreh Rama me shaka në nisje të intervistës.
I pyetur se për çfarë arsye zgjodhi të emëronte një ministre virtuale, Rama shpjegoi se shfrytëzimi i teknologjive të reja është domosdoshmëri për një vend si Shqipëria, që synon të përshpejtojë reformat dhe të arrijë modernizimin në kohë më të shkurtër.
“Së pari, nuk mund ta dini nëse po flisni me mua apo me një version timin me inteligjencë artificiale. Por për sa kohë që ju flet përmes kanalit të kryeministrit, është përgjegjësia ime. Po, ne kemi vendosur të bëjmë këtë hap të madh sepse duam të nxisim me shpejtësi më të madhe reformat tona dhe nuk është domosdoshmërisht për reformat në terma digjitale, por në terma modernizimi strukturalisht.
Besoj fort në teknologjitë e reja, tani edhe në AI se janë një bekim për vende si tonat, që vijnë nga një rrugë e gjatë, dhe mund të përdorin teknologjinë. Në kohë progresi linear do ishte më e vështirë për të arritur dhe fituar kohë në dekada e shekuj. Por në kohë progresi eksponencial mund të bëjmë ndryshim. Këtë besoj.”, tha Rama.
