Marash Kumbulla është kthyer në këto ditë në një emër shumë të diskutuar në Itali. Mbrojtësi i përfaqësueses shqiptare nuk po gjen hapësira nën drejtimin e Zhoze Murinjos dhe për të është menduar kalimi në një skuadër tjetër. Por Roma nuk ka ndër mend t’ia kalojë Kumbullën një rivali në luftën për Europën, siç është Napoli dhe ka refuzuar kërkesën e këtij të fundit.
Mediat italiane kanë bërë të ditur se ka qenë pikërisht Edi Reja ai që i ka sugjeruar drejtuesve të Napolit që të marrin Kumbullën si një alternativë për prapavijën, ku në muajt e ardhshëm do të mungojë Kulibali i cili merr pjesë në Kupën e Afrikës.
Kështu, napolitanët i kanë bërë një kërkesë Romës që të marrin futbollistin në huazim deri në mbyllje të këtij edicioni, me të drejtën e blerjes përfundimtare.
Por ata janë ndeshur me një refuzim të qartë nga verdhekuqtë, të cilët nuk duan që të përforcojnë rivalë me një lojtar cilësor si Kumbulla, nëse bëhet fjalë për huazimin. Një gjë e tillë mund të ndodhë vetëm nëse diskutohet blerja direkte e kartonit të futbollistit shqiptar.
