Ndikimi rus në Ballkan ka vënë në alarm SHBA dhe NATO. Situata në rajon është përkeqësuar kohët e fundit dhe kjo ka bërë që dje komandanti i forcave të SHBA-së në Evropë dhe njëherësh komandant suprem i NATO, të raportojë në Senatin Amerikan. Duke folur në komitetin për Forca të Armatosura, Curtis M. Scaparrotti tha se afrimi i zgjedhjeve evropiane, tensionimi i situatës me protestat në shtetet ballkanike si dhe rreziku i një konflikti të ri Kosovë-Serbi, po shton përpjekjet ruse për destabilizimin e rajonit. Komandanti i forcave amerikane tha më tej se Rusia pas dështimit në Maqedoni dhe Malin e Zi po bën gjithçka për të sjellë kaos në vende të tjera.
Sipas tij, Rusia po nxit destabilizim për të bllokuar integrimin në BE dhe në NATO të vendeve të Ballkanit. “Situata e sigurisë në Ballkan është shumë e brishtë dhe vendet e rajonit janë shënjestra kryesore të ndikimit malinj të Rusisë. Rusia e ushqen paqëndrueshmërinë rajonale në përpjekje për të parandaluar vendet e Ballkanit në përparimin e tyre drejt integrimit euroatlantik”, tha ai.
Komandanti i NATO ka thënë se të gjitha vendet ballkanike janë të rrezikuara nga Rusia. Gazeta e ka thënë se Moska kohët e fundit po depërton dhe në vendin tonë, përmes njerëzve të saj në politikë. Faktet se pas protestës së opozitës fshihen rusët janë shtuar ndjeshëm. Ish-nëndrejtori i FBI tha pak ditë më parë se Moska po tenton të bllokojë integrimin e Shqipërisë.
Fakti që dhe komandanti i NATO dje përmendi po këtë skenar të Moskës dhe protestat, dëshmon qartë se situata në Tiranë dhe vendet tjera rajonale po shqetëson ndjeshëm SHBA dhe NATO. Të vetmet shtete që nuk kanë hapur negociata me BE janë Shqipëria e Maqedonia, pasi Serbia e Mali i Zi e kanë mbyllur këtë kapitull. Por sipas NATO, Moska po bën ç’është e mundur që vendet Ballkanike të mbeten jashtë BE, pasi anëtarësimi dobëson interesat e Putinit në rajon.
Ndërhyrja e rusëve në Shqipëri
Mediat kosovare kanë nxjerrë dje në ditë fakte se si agjenturat ruse kanë depërtuar në Shqipëri e Kosovë. Në fillim të javës bëri bujë arrestimi i ruses Iana (Andreu) Minochkina, ndërsa mediat kosovare kanë hedhur dyshime se ajo është pjesë e agjenturave ruse. Po ashtu ato kanë nxjerrë fakte, se ajo ushtron veprimtari edhe në Shqipëri, e madje është e martuar me një shqiptar.
Sipas mediave, Iana (Andreu) Minochkina, shtetase ruse, si dhe bashkëshorti i saj, Luis (Menduh) Bekteshi, shtetas shqiptar, pjesëtarë të UNMIK-ut, janë arrestuar për vjedhjen e një çante. “Ballkani.info” raporton se rusja është drejtoreshë ekzekutive e organizatës joqeveritare “Perspektiva”, me qendër në Durrës. Para se të vinte në Kosovë, Minochkina kishte punuar edhe në Shqipëri. “Ballkani.info” ka shkruar se sipas burimeve brenda organeve të sigurisë, veprimtaria e ruses Iana Minochkina është tejet e dyshimtë.
Në shkrim thuhet se futja e saj në institucionet e Kosovës dhe Shqipërisë përmes aktiviteteve për të rinjtë në kuadër të UNMIK-ut, si dhe tentativat e saj për edukimin e të rinjve, ndërkohë që në anën tjetër u kap duke vjedhur, vënë në dyshim aktivitetin e saj. Portali shkruan se ajo gjatë gjithë kësaj kohe ka qenë shumë e angazhuar edhe për krijimin e një opinioni të mirë për Federatën Ruse tek të rinjtë e Kosovës dhe Shqipërisë.
“Balkan.info” dhe shumë media të tjera kanë ngritur dyshime se ajo mund të jetë një “agjente” ruse, me qëllim që Moska të shtrijë ndikimin në Shqipëri e Kosovë. Ajo që e forcon këtë bindje është se Kosova pak më herët largoi nga territori i saj dy vajza ruse, të cilat punonin po për UMNIK, pasi ishin spiune. Fakti që dhe Minochkin, punon për këtë organizatë, ka rritur dyshimet se kemi të bëjmë po me agjente të fshehtë. /Kliti Topalli
