Policia Rrugore nuk do t’iu ndalojë më pa arsye. Shkelësit e rregullave të Qarkullimit Rrugor do të konstatohen nga efektivë në lëvizje dhe gjobat do të dërgohen me postë.
“Automjeti me të cilin po patrullojmë ka të instaluar një kamera 2K. Agjenti që konstaton shkeljen bën dokumentimin me anë të pajisjes, si në këtë rast, të këtyre automjeteve të parkuara dysh, ku saktësohet ora, vendi dhe me të dhënat e përfituara nga leja e qarkullimit, i adresohet shkelësit brenda afatit 30 ditor që parashikon Kodi Rrugor”, tha Taulant Gjoka, shef i trafikut në Tiranë.
Një risi në organizimin e punës së Rrugorëve është edhe heqja e policive nga kryqëzimet.
“Duke qëndruar policët në kryqëzime është krijuar një stereotip negativ për drejtuesit e mjeteve, të cilët mendojnë se, edhe kur ka trafik, aty do të jetë punonjësi i policisë për të shfuqizuar semaforin apo duke i dhënë mundësi të mos respektojnë sinjalistikën”, tha më tej Taulant Gjoka.
Së shpejti, nga duart e punonjësve të Policisë Rrugore do të hiqet edhe blloku i gjobave, për t’u zëvëndësuar nga një tablet elektronik.
