Rreth një vit më parë, zyrat e shoqërisë “Ante Group Shpk” (Ish Infinit Construction, Ish Merko) u bastisën nga Drejtoria e Përgjithshme e Parandalimit të Pastrimit të Parave, e cila nga kqyrja e dokumentave kishe hasur në veprimtari të dyshimta financiare të kompanisë në fjalë.
DPPP ka konstatuar se shoqëria “Ante Group” e Gjysho Merkos, ka kryer veprimtari masive dhe sistematike të pastrimit të parave nëpërmjet kompanisë së tij, përmes transaksioneve të dyshimta ku qarkullonin shuma të mëdha të parave.
Ajo që ra në sy nga hetimi i DPPP ishte se, transaksionet e dyshimta të pastrimit të parasë, bëheshin përmes një banke të nivelit të dytë, e cila zotërohet 100% nga një oligark i fuqishëm, pjesë e skemave të aktivitetit antiligjor përmes ortakut të tij, biznesmenit që lëviz fijet e këtij grupi kriminal.
Por për habi, asnjë nga provat e siguruara nga DPPP nuk është dorëzuar në polici dhe prokurori, madje dosja fle akoma në sirtaret e institucionit, sepse të përfshirë janë dhe zyrtarë të lartë e biznesmenë të fuqishëm, ku nuk mungojnë edhe personazhe të njohur të nëntokës.
Burimet pranë këtij institucioni pohojnë, se asgjë nuk është bërë në këtë drejtim, për parandalimin e një prej shoqërive më të mëdha të pastrimit të parave dhe problematike të trekëndëshit Fier-Berat-Lushnjë, edhe pse provat e dosjes flasin qartë dhe kanë zbardhur të gjithë skemën e veprimtarisë së paligjshme të subjekteve në fjalë duke nisur nga:
“Transfertat me jashtë, të dyshuara për aktivitet të pastrimit të parasë si derdhje me para në dorë me shuma të konsiderueshme”,
“Investime të larta në pasuri të paluajtshme me burim të panjohur të fondeve”,
“Investime në mallra luksi nga persona, të cilat nuk justifikojnë burimin e fondeve apo persona me precedentë penal”,
“Transferta të mëdha vlerash të dyshimta (në mbërritje apo në dalje edhe në tentativë) me përfshirje të subjekteve, shtetasve të huaj dhe të pajustifikuara me dokumentacion mbështetës”,
“Veprime jashtë profilit të klientit”, “Sponsorizime, dhurime apo dhënie huaje nga/për të tretë pa u konstatuar lidhje të mundshme mes palëve”,
“Transaksione të pazakonta krahasimisht me profilin financiar të personit/subjektit; mashtrime të formave të ndryshme; transaksione financiare të kryera nga persona me precedentë të mëparshëm penalë apo persona të lidhur me ata me precedentë; transferta të dyshimta me vende të konsideruara me risk”.
Këto të dhëna janë siguruar nga dosja hetimore, e cila edhe pas më shumë se një viti nuk arriti dot të gjej rrugën e drejtësisë, po kush e pengoi apo pagoi për heshtjen duhet të na e thonë organet e reja të drejtësisë. Nëse SPAK i shkon kësaj çështje deri në fund, do të parandalojnë një nga grupet më të mëdha të pastrimit të parave në vend, ku bëjnë pjesë edhe personazhe të rëndësishme që gllabërojnë përmes zyrtarëve të korruptuar, miliona euro të parave publike./Ekskluzive.al
