Ditët e djeshme janë mbushur plot 23 vite nga dhuna barbare e shtetit ndaj opozitës së kohës. Më 28 maj të vitit 1996, qeveria e Sali Berishës dhunoi ashpër përfaqësues së opozitës së asaj kohe, shumica anëtarë dhe përfaqësues të Partisë Socialiste. Për të hedhur më shumë dritë mbi këtë ngjarje, ka folur për gazetën “SOT”, një ndër protagonistët.
Bëhet fjalë për ish-ministrin e Mbrojtjes, Sabit Brokaj. Ky i fundit gjatë një prononcimi për gazetën deklaroi se pak përpara se të protestonte për manipulimin e zgjedhjeve në 28 maj, opozita e asaj kohe u rrethua nga 4 kordonë policie, në mënyrë që të mos lejohesh që të dilni jashtë për t’iu bashkuar demonstruesve në Sheshin “Skënderbej”. Megjithatë, pas shumë përpjekjesh, zoti Brokaj theksoi se socialistët, sidomos gratë socialiste ia arritën të çanin kordonin e policisë.
“Partia Socialiste (selia), asokohe ishte e rrethuar sidomos nga porta kryesore nga tre apo katër rreshta me polica dhe forca speciale me skafandra, duke na bllokuar brenda. Ne të ndodhur përpara këtij momenti delikat, ne menduam se ishte e pamundur që të dilnim nga selia e PS-së.
Dhe për mua është i paimagjinueshëm dhe i vlerësueshëm guximi i grave socialiste, të cilat atë rreshtim më katërsh kordonësh të armatosur policie dhe punonjës të Shërbimit Informativ Kombëtar e çanë dhe e bënë të mundur që demonstruesit e Partisë Socialiste dhe aleatëve të saj të dalin në Sheshin “Skënderbej” për të protestuar kundër dhunës shtetërore që shkatërroi zgjedhjet dhe grabiti votën masivisht votën e qytetarëve shqiptarë”, deklaroi ai.
Urdhri u dha nga Sali Berisha
Ish-ministri i Mbrojtjes, Sabit Brokaj vijoi më tej në prononcimin për gazetën, duke zbuluar se pas mbërritjes në Sheshin “Skënderbej”, opozita dhe përfaqësuesit e saj u dhunuan barbarisht,ndërsa bëri me dije se urdhri për këtë ngjarje makabre u dha nga Berisha. “26 dhe 28 maji i vitit 1996, ishte dhuna e pushtetit të asokohe ndaj çdo kundërshtari real apo imagjinar të Berishës.
Domethënë dhuna e përgjakshme e ushtruar ndaj drejtuesve të opozitës asokohe ishte e organizuar dhe urdhëruar nga Berisha dhe pushteti i tij. Në sheshin ku protestoje nga opozita ishte 7-8 mikrobus policie, të cilët na u sulën dhe na përgjakën. Madje, në ballë të policave ishte vetë komandantin Agim Shehu.
Këto janë fakte të pakontestueshme dhe i dinë të gjithë protagonistët e asaj kohe. Kështu që, me një dhunë kaq të organizuar dhe kaq të dhunshme absolutisht ndaj gjithë partive, këtë mund ta bënte vetëm Sali Berisha. Kjo për faktin se askush tjetër nuk mund t’i bindej një urdhri të tillë katastrofë, që shkaktoi atë dhunë ndaj nesh. Domethënë, 26 maji i vitit 1996 është gjesti më i dhunshëm i anti-demokracisë 30 vjecare”, u shpreh ai.
Ja disa nga të dhunuarit
Ish-ministri i Mbrojtjes, Sabit Brokaj theksoi më tej se mes personave të dhunuar dhe gjakosur nga pushteti i Berishës, ishin Servet Pëllumbi, Namik Dokle, Erjon Braçe, deri tek Arben Imami dhe Skënder Gjinushi. “Në momentin që ne prisnim rezultatet e betejës, në zyrën e Servet Pëllumbit erdhën të plagosur dhe me gjak që nga Servet Pëllumbi, Namik Dokle, Erjon Braçe, Ndre Legisi, Pandeli Majko, Blendi Gonxhe, etj.
Ndërkaq, dhunë u ushtrua edhe ndaj partive të tjera të majta, nga më ta rrahurit ka qenë Arben Imami, të cilit i copëtuan dhëmbët, Skënder Gjinushin gjithashtu, doktor Shahin Kadarenë që asokohe ishte në aleancë me Saliun”, tha ai.
Brokaj: 26 maji i vitit ’96, dita më e errët
Në përfundim të prononcimit të tij për gazetën “SOT”, zoti Brokaj i quajti 26 dhe 28 majin si dy nga ditët më të errëta dhe më të dhunshme të ndodhura ndonjëherë në Shqipërinë e post-komunizmit. “26 dhe 28 maji i vitit 1996 është një nga ditët më të errëta dhe më të dhunshme të pluralizmit në Shqipëri, prej vitit 1991 deri më sot.
Kjo në kuptimin se dhuna u shtri në të gjithë hapësirën e demonstratës dhe përfshiu jovetëm thuajse të gjithë përfaqësuesit e partive politike që ishin asokohe në atë koalicion nga e majta, por edhe shumicën e drejtuesve të tyre.
Ishte një moment politik, ku përballë pjesës dërmuese të partive politike ishte e vetme Partia Demokratike. Kështu që u lokalizua goditësi, duke goditur shumicën e përfaqësuese të partive politike”, nënvizoi ish-ministri i Mbrojtjes, Sabit Brokaj. /Rigels Seliman
