5 mijë lekë të vjetra kanë shkaktuar disa viktima mes dy fiseve në Balldre të Lezhës.
Ditën e sotme Lezha u trondit, pasi nga një makinë me xhama të zinj hapi zjarr një person, duke lënë të vdekur në vend Nikolin Marku (Lekstakaj).
Sipas dyshimeve paraprake, shkak për krimin e rëndë është gjakmarrja dhe se gjithçka, është vetëm një pasojë e 3 muajve më parë. Pikërisht më 9 prill, në një lokal në Shëngjin do të ekzekutohej me breshëri plumbash biznesmeni Ardian Nikulaj.
Megjithatë, hasmëria mes fiseve Lekstakaj dhe Nikulaj është më e vjetër se këto dy vrasje. Gjithçka ka nisur 27 vite më parë, vetëm për 5 mijë lekë të vjetra.
Në vitin 1996, në një karburant në dalje të qytetit të Lezhës ka mbetur i vrarë vëllai i Ardian Nikulajt. Në atë kohë, vëllai i biznesmenit Nikulaj, Pëllumb Nikulaj, bashkë me Fran Qulajn, punonin në një pikë karburanti. Një nga pjesëtarët e familjes Lekstakaj ka shkuar për të furnizuar makinën aty dhe në një moment punonjësit kanë nisur të debatojnë debatuar me drejtuesin. Debati ka ndodhur me pretendimin se nuk kishte bërë pagesën e karburantit, 5 mijë lekë të vjetra.
Pas debatit ata janë larguar dhe njëri prej tyre është rikthyer i armatosur disa minuta më vonë duke qëlluar në drejtim të karburantit. Nga të shtënat mbeti i vrarë edhe vëllai i Ardian Nikulajt, Pëllumbi dhe kolegu tij Fran Qulaj.
Pak muaj pas kësaj ngjarje, më 29 shtator të vitit 1997, në Balldre të Lezhës u vranë Gëzim Ded Lekstakaj dhe Lauren Ndoc Gjetja, konkretisht dajë e nip. Ndërsa më 30 mars të vitit 1999, është vrarë shtetasi Gjovalin Lekstakaj dhe është plagosur Pjetër Lekstakaj.
