Dy mjekët, udhëheqës të lartë të PD, njeri 75 vjeç dhe tjetri 70 vjeç, qëndruan në krye prej 29 vitesh, qysh nga dita e parë, kur Ramiz Alia u dorëzoi vendimin për krjimin kësaj partie, por pas dorëzimit të mandateve dhe siç duket, bindjes së tyre për fundin politik, kanë zgjedhur të marrin pensionin e pleqërisë, megjithëse sipas ligjit, Berisha duhej të kishte dalë 13 vite më parë, ndërsa Shehu 6 vite më parë
Deputetët e PD-LSI, vërtetë dorëzuan mandatet, por do vazhdojnë të jenë në borderonë e shtetit, mbasi sipas Ligjit Nr.8097, datë 21.03.1996, të “rilindur” me Ligjin Nr. 27/2015, datë 26.03.2015, hartuar e votuar bashkërisht pozitë-opozitë, ata do paguhen edhe për 3 vite radhazi, me 50% të pagës mujore, ose 78 mijë e 300 lekë të reja në muaj, baraz me 3 pensione mujore mësuesi.
Pasi u bindën, që mandatet u “ikën” vërtetë, deputetët që po luftojnë për hallet e popullit, vrapuan në zyrat e ISSH, për të zgjidhur hallin e tyre, nga frika se sipas ligjit për pagesat kalimtare (asistenca), nëse nuk plotësonin formularët brenda 15 ditësh nga djegia zyrtare e mandateve, u digjej edhe asistenca 3-vjeçare, me vlerë 50% e pagës së deputetit, që është e barabaratë me 3 paga minimale, ose me 2 paga polici.
Mirëpo, sipas informacionit konfidencial, ardhur në “PAMFLETI” nga një zyrtar i Institutit të Sigurimeve Shoqërore (ISSH), thuhet se nga 60 deputetët, që dorëzuan mandatet, vetëm Sali Berisha e Tritan Shehu, kanë dalë të fituar.
Deputeti Berisha 75 vjeç (15 tetor 1944) dhe deputeti Shehu 70 vjeç (24 prill 1949), kanë refuzuar asistencën me vlerë 50% pagë mujore për 3 vite, duke zgjedhur të dalin në pension të përjetshëm e të plotë pleqërie, me pagesë mujore shmë më të lartë.
Dy deputetët, pas djegies së mandateve, të bindur që u janë djegur shanset për të mbetur në politikë, kanë plotësuar dosjen e daljes në pension të plotë, dhe qysh prej datës 1 mars 2019, u ka nisur pagesa e pensionit të pleqërisë, Sali Berishës me vlerë 149 mijë e 770 lekë të reja në muaj, ndërsa Tritan Shehut, me vlerë 119 mijë e 560 lekë në muaj./Pamfleti
