Ministri i Jashtëm Iranian, Mohammad Javad Zarif, surprizoi jo pak kur mbërriti në Biarritz ku po mbahet samiti i G7-s, në përpjekje për zhbllokuar ngërçin diplomatik që ka shkaktuar programi i diskutueshëm bërthamor i Teheranit.
Vizita e tij e papritur përfaqëson përpjekjen e mikpritësit të samitit, presidentit francez Emmanuel Macron, për të gjetur një mënyrë që të ulë tensionet mes Iranit dhe Shteteve të Bashkuara.
Zarif nuk pritet të ketë një takim kokë me kokë me presidentin amerikan, por prezenca e të dyve në të njëjtin vend ka ndezur shpresat për një ulje tensionesh. “Zarif … ka mbërritur në Biarritz … për të vazhduar bisedimet në lidhje me masat e fundit midis presidentëve të Iranit dhe Francës”, shkroi në Tuiter zëdhënësi i ministrisë së jashtme iraniane, pasi faqet e gjurmimit të fluturimeve zbuluan se avioni i Zarifit kishte zbritur në Biarritz.
Presidenca Franceze e konfirmoi mbërritjen e tij, por theksoi se nuk ishin planifikuar bisedime me palën Amerikane.
Macron zhvilloi bisedime me Zarifin në Paris në prag të samitit të G7-s dhe temë kryesore ka qenë përpjekja për t’i ulur Teheranin dhe Uashingtonin në tryezën e bisedimeve. Politika e Trumpit për të aplikuar “presionin maksimal” mbi Teheranin përmes sanksioneve është kritikuar nga fuqitë evropiane dhe shihet si një zhvillim që rrit rrezikun e konfliktit në Lindjen e Mesme.
Macron i ka kërkuar administratës amerikane të ofrojë një lloj lehtësimi për Iranin, të tilla si heqjen e sanksioneve për shitjet e naftës në Kinë dhe Indi, ose një linjë të re krediti për të mundësuar eksportet. Ky është parë si një hap i parë për ta rikthyer Iranin në tryezën e bisedimeve, çka më pas mund të çojë në një marrëveshje të re ndërkombëtare për të kufizuar programin e tij bërthamor.
Vitin e kaluar, Trump vendosi largimin e SHBA-ve nga marrëveshja historike për programin bërthamor, e arritur mes Iranit, SHBA-ve, fuqive evropiane, Rusisë dhe Kinës.(TemA TV)
