Shtetet e Bashkuara të Amerikës i dërguan ditën e djeshme një tjetër ultimatum të qartë opozitës sa i takon djegies së mandateve. Pak ditë më parë bëri një reagim shumë të fortë ambasada e SHBA në Tiranë, e cila kërkoi nga deputetët opozitarë të refuzojnë thirrjet për të braktisur mandatet e tyre.
Por teksa përflitej se Partia Demokratike dhe Lëvizja Socialiste për Integrim pretendonin se reagimi i ambasadës nuk ishte reagimi zyrtar i Shteteve të Bashkuara, Departamenti Amerikan i Shtetit iu dha një “shuplakë” opozitarëve. Gjatë një telefonate me kryetarin e PD, Lulzim Basha dhe kryetaren e LSI, Monika Kryemadhi, DASH ua ka bërë të qartë opozitarëve se nuk i mbështet në planin e tyre për të djegur mandatet.
Një zëdhënës i Departamentit Amerikan të Shtetit u shpreh dje në një prononcim për “Zërin e Amerikës” se zëvendësndihmësi Sekretari i Shtetit për Evropën, Matthew Palmer ka zhvilluar dy biseda të veçanta telefonike me Bashën dhe Kryemadhin. Sipas zëdhënësit të DASH, Palmer gjatë bisedës së tij me liderët opozitarë u ka treguar në mënyrë të prerë se SHBA kundërshton djegien e mandateve.
Po ashtu, mësohet që Palmer tu ketë bërë thirrje Bashës dhe Kryemadhit që të qëndrojnë të angazhuar në mënyrë konstruktive në proceset demokratike. Sipas zyrtarit të DASH, opozita luan një rol jetik në një shoqëri demokratike dhe ky rol nuk duhet të humbasë.
Palmer po ashtu i ka këshilluar krerët e PD-LSI kundër dorëheqjeve të koordinuara dhe në masë të deputetëve të opozitës nga Parlamenti. Zëvendësndihmës Sekretari i Shtetit për Evropën, Mattheë Palmer nga ana tjetër gjatë bisedës telefonike me Bashën dhe Kryemadhin e ka ndalur theksin edhe tek ndikimi që ky akt i paprecedentë i opozitës do të kishte tek reformat e ndërmarra nga qeveria shqiptar. Sipas tij, nëse digjen mandatet dhe destabilizohet vendi, reformat, e veçanërisht ajo në drejtësi do të pengohen, çka për SHBA është e patolerueshme.
Prandaj DASH i kërkoi opozitës që të tërhiqet nga plani për djegien e mandateve për të mos dëmtuar progresin e bërë deri tani. Gjithashtu, Palmer ka kërkuar nga opozitarët që të distancohen nga dhuna dhe ta dënojnë atë. Qoftë deklarata e ambasadës amerikane, ashtu edhe reagimi i DASH tregojnë fare qartë se opozita nuk mbështetet nga ndërkombëtarët, sidomos nga SHBA. Në këtë mënyrë, mund të themi se PD-LSI kanë hyrë në luftë me ndërkombëtarët me këtë akt që po ndërmarrin.
<strong>Reagon Fleckenstein</strong>
I ashpër dhe i prerë në reagimin e tij ishte edhe raportuesi për Shqipërinë në Parlamentin Evropian, Knut Fleckenstein sa i takon çështjes së djegies së mandateve. Në një intervistë të dhënë për “Deutsche Welle”, Fleckenstein deklaroi se opozita duhet ta kryejë detyrën e saj në Parlament, ndërsa u shpreh i zhgënjyer nga kjo sjellje. “Kjo është një lloj prishjeje kontrate. Nuk mund të them, nëse kjo është e drejtë apo e gabuar, por di që parlamentarët duhet ta kryejnë punën e tyre në Parlament.
Jam i zhgënjyer që papushim na duhet të flasim për atë që deputetët t’i ushtrojnë apo jo mandatet e tyre. Por është e vështirë për mua të jap një përgjigje për atë, nëse opozita ia kthen vendet e deputetëve popullit apo nëse i ushtron detyrat e saj, këtë duhet ta vendosin vetë ata, nuk mund të jap një këshillë”, tha ai. Fleckenstein paralajmëroi se djegia e mandateve do të ketë një ndikim të keq në vendimin për hapjen e negociatave. “Një vend, ku opozita i dorëzon mandatet e saj, do të ketë më të vështirë “të shesë” reformat e veta pozitive, se sa kur Parlamenti do të vazhdonte me punën e tij”, deklaroi raportuesi për Shqipërinë në PE.
Mimoza <strong>Ibra</strong>
