Komisioneri i Zgjedhjeve, Ilirjan Celibashi, po përpiqet t’i hapë rrugë një kërkese antiligjore të Partisë Demokratike, e cila kërkon që rezultati i votimit elektronik në njësinë nr. 10 dhe në Vorë të mos shpallet në orët e mbrëmjes, por në mëngjesin e nesërm. Kjo, sipas PD-së, për të shmangur ndikimin e tij në perceptimin publik për fituesin e zgjedhjeve.
Së pari, kjo nuk është një kompetencë e Komisionerit, por një çështje e përcaktuar nga rregullorja e Komisionit Qendror të Zgjedhjeve, e cila sanksionon qartë se rezultati i votimit elektronik duhet të shpallet një orë pas përfundimit të votimit — siç ka ndodhur gjithmonë deri tani.
Nëse rezultati i votimit elektronik do të shpallej një ditë më pas, atëherë përse janë harxhuar miliona euro për pajisjet e votimit elektronik, nëse synimi nuk është që të kemi rezultatin menjëherë? Pse të presim mëngjesin kur me numërimin manual do të dimë rezultatin për gjithë Shqipërinë?
Komisioneri Celibashi, gjatë gjithë ditës së sotme, ka vepruar vetëm sipas kërkesave të Partisë Demokratike. Kur Partia Socialiste kërkoi shtyrjen e orarit të votimit në Vlorë për shkak të Giro d’Italia, ai e hodhi çështjen në votim dhe përdori bojkotin e PD për të mos e shtyrë votimin. Por në rastin e rezultatit të votimit elektronik, nuk e lë në dorë të anëtarëve të KQZ-së, por e merr vendimin vetë.
Gjithashtu, në incidentin e dhunshëm të Flamur Nokës me disa qytetarë — një prej të cilëve ishte vëzhgues — Celibashi mbajti haptazi anën e Nokës, duke përjashtuar të gjithë vëzhguesit nga qendra e votimit.
Tani që ka një detyrim ligjor për të shpallur rezultatin e votimit elektronik, po përpiqet të mbajë lotët e Sali Berishës dhe Fatmir Mediut deri në mëngjes, me shpresën se mos ndodh ndonjë “mrekulli” gjatë natës që të fshehë humbjen e thellë.
