Një sherr masiv ka ndodhur pak pas mesnatës mes të dielës dhe të hënës, mes një grupi shqiptarësh dhe grekësh në Athinë.
Ngjarja ka ndodhur rreth orës 01.40 të kësaj të hëne në zonën e ‘Geraka’ në periferi të kryeqytetit grek, pak pas protestës së mbajtur në Athinë, ku u dënua vrasja nga policia shqiptare e minoritarit grek në Gjirokastër.
Si pasojë e një konflikti të dhunshëm fizik, me thika dhe armë kanë mbetur të plagosur gjashtë persona.
Ngjarja ndodhi në kryqëzimin e rrugëve Domokos dhe Gerakas, në lokalitetin e Gerakas.
Prej të dëmtuarve, katër janë plagosur me thikë dhe dy me armë, ku nga këta të fundit një është shqiptar dhe një tjetër grek i goditur me plumb në fyt, i cili ndodhet në gjendje të rëndë.
Ndërkohë katër të plagosurit e tjerë janë qëlluar me thikë, ku dy janë shqiptarë dhe dy grekë.
Nuk dihet ende nëse ngjarja ka të bëjë me larje hesapesh, apo mund të ketë lidhje me vrasjen e minoritarit grek në Bularat të Gjirokastrës, Kostandinos Kaçifas, i cili pasi hapi zjarr ndaj policisë u qëllua për vdekje.
Për të zbuluar më shumë lidhur me këtë ngjarje, hetimet nga ana e autoriteteve greke janë në vijim.
