Biznesmeni Ermal Beqiri, një nga emrat më aktivë në tregun e teknologjisë së informacionit dhe përfitues i një numri të madh tenderash publikë, përfshirë ato të shpallura nga Agjencia Kombëtare e Shoqërisë së Informacionit (AKSHI) ka hyrë në radarët e SPAK. Mësohet se gjatë mesjavës së kaluar oficerë të BKH-së kanë ushtruar kontrolle në ambientet e kompanisë “Soft & Solution”, në pronësi të Beqirit.
Ende nuk dihet nëse këto veprime hetimore lidhen drejtpërdrejt me tenderat e fituar nga kompania apo nëse janë pjesë e një hetimi më të gjerë të nisur nga Prokuroria e Posaçme Kundër Korrupsionit dhe Krimit të Organizuar (SPAK). Por emri i Beqirit lidhet ngushtë me atë të biznesmenit tjetër të sektorit IT, Ergys Agasi, i cili përmes kompanisë “EA Solution” është futur me shpejtësi në tregun e teknologjisë, duke fituar gjithashtu kontrata të rëndësishme publike. Agasi u pa disa ditë më parë në ambientet e SPAK, ku sipas burimeve qëndroi për disa orë për t’u marrë në pyetje, megjithëse nuk janë dhënë detaje mbi çështjen për të cilën u thirr. Madje u raportua nga mediat se atij i janë sekuestruar telefona dhe dokumente të rëndësishme. Z.Beqiri është portretizuar si “oligarku i teknologjisë së informacionit”, ndoshta pa të drejtë sa i përket emrit të tij, nëse i referohemi të dhënave më poshtë.
Vetë AKSHI nuk ka dhënë asnjëherë shpjegime se përse z.Beqiri me “Soft & Solution” ka qenë i preferuari i tyre për tenderët edhe pas skandalit të sulmit kibernetik që rrëzoi sistemet në vend, përfshi edhe e-Albanian si edhe shërbime të tjera duke vjedhur dhe nxjerrë në publik dhjetëra “tera byte” të dhëna personale të qytetarëve të Republikës së Shqipërisë. Në një intervistë të bujshme disa muaj më parë, ish-zv.kryeministri Arben Ahmetaj përmendi për herë të parë Ergys Agasin duke e portretizuar si personin që bën koordinimin mes krimit dhe maxhorancës, që pi verë 33 600 euro shishja me kryeministrin në Dhomën e Luleve në Kryeministri dhe…që kontrollon tenderët e AKSHI-t. Kjo e fundit ishte një akuzë e re për Ergys Agasin, i cili edhe më parë ishte portretizuar ngjashëm edhe nga lideri i opozitës.
Por, ku lidhet Ergys Agasi me sektorin e Teknologjisë së Informacionit?
Ergys Agasi rezulton të jetë futur në këtë treg në mars 2023 duke regjistruar në emrin e tij, kompaninë “EA Solution” me NIPT M31516009A me adresë “Rruga; Ismail Qemali”, pallati Hersi, Kati 2, Hyrja Nr. 6, Tiranë. Agasi e mban vetëm një vit kompaninë në këtë adresë dhe transferon zyrat pikërisht…në adresën: Rruga “Hoxha Tahsim” Pallati 152, Hyrja 1, Kati 2, Tiranë. Është pikërisht e njëjta adresë ku edhe ka zyrat z.Beqiri dhe kompania “Soft & Solution”.
Godinë dy katëshe, e restauruar me shije, por që hapësira totale e saj nuk duket të jetë e mjaftueshme për të mbajtur brenda punonjësit e dy kompanive të ndryshme (!) që bëjnë miliona euro punë dhe fitim në një vit. Megjithëse, duke analizuar bilancin e “EA Solution”, z.Agasi nuk i duhen zyra të bollshme pasi ai rezulton te ketë një numër tepër të kufizuar punonjësish që mund të mblidhen edhe në një zyrë 3X4 metra katror bashkë me administratoren edhe sikur të shkojnë të gjithë në punë në 7 ditë të javës. Pikërisht këtu qendron edhe magjia e z.Agasi dhe kompanisë “EA Solution”.
Kompania rezulton se vetëm në 9 muaj jetë, pra nga marsi në dhjetor 2023 ka bërë 2.4 milion euro xhiro, nga të cilat rreth 2.3 milion euro janë fitim para tatimit. Pra, “EA Solution” ka patur më pak se 100 000 euro shpenzime gjatë 9 muajve duke përfshirë këtu, pagat e punonjësve, qira zyrash, energji elektrike, ujë si edhe shpenzime të tjera. Por, le të fokusohemi te pagat. Nga bilanci, rezulton se EA solution ka dhënë 82 000 euro paga ndaj punonjësve gjatë 2023 dhe rreth 10 000 euro sigurime shoqërore dhe shëndetësore. Një pagë këtë sektor fillon nga 1 500 euro në muaj për fillestarët deri në 2 500 euro apo më shumë për ata që janë me më shumë eksperiencë.
Duke marrë parasysh që kompania e z.Agasi ka fituar 2.3 milion euro gjatë 2023 presupozohet se ka patur punonjës shumë të aftë që ofrojnë shërbime cilësore dhe sigurisht, të paguhen shumë. Nga një përllogaritje e përafërt, rezulton se me 92 000 euro shpenzime totale për paga dhe sigurime gjatë 9 muajve nga kompania “EA Solution” të jenë paguar 3-4 punonjës bashkë me administratoren e kompanisë! Këto janë ushtrime shumë të thjeshta matematikore që sigurisht duan një përgjigje, e cila duket se nis të zbërthehet pikërisht në korrik 2021 kur z.Beqiri blen për 1 milion lekë një kompani qindra milionëshe dhe sidomos në tetor 2024 ku “EA Solution” e z.Agasi shkon dhe “strehohet” pikërisht në zyrat e “Soft & Solution” në adresën: Rruga “Hoxha Tahsim” Pallati 152, Hyrja 1, Kati 2, Tiranë. Edhe pse nuk ka konfirmim zyrtar se kontrollet e BKH-së tek kompania e Beqirit dhe paraqitja e Agasit në SPAK lidhen me të njëjtën çështje, fakti që të dy janë në qendër të vëmendjes së autoriteteve hetimore njëkohësisht ka ngritur pikëpyetje në opinionin publik. /Sot
